Le apostoloʼoboʼ tu kʼaʼaytoʼob tuláakal yóokʼol kaab le jatsʼuts baʼaxoʼob ken u beet Dios, jeʼex aʼalaʼabiktiʼob tumen Jesusoʼ. Tu añoil 47, le sukuʼunoʼob yaan Antioquíaoʼ tu yaʼaloʼob tiʼ Pablo yéetel Bernabé ka viajarnakoʼob jejeláas kaajoʼob utiaʼal u kʼaʼaytajoʼob. Yéetel kiʼimak óolal binoʼob Asia Menor, tiʼ kaajoʼob jeʼex Derbe, Listra yéetel Iconio.

Pablo yéetel Bernabeeʼ kʼaʼaytajnajoʼob tiʼ tuláakal máak, jeʼex tiʼ máakoʼob ayikʼaloʼob, óotsiloʼob, táankelmoʼob yéetel tiʼ nukuch máakoʼob. Yaʼab máak tu tsʼáaj u fe tiʼ Cristo. Kʼaʼaytajnajoʼob xan tiʼ Sergio Paulo, u gobernadoril Chipre. Chéen baʼaleʼ juntúul j-meeneʼ tu yilaj maʼ u tsʼáaik u fe le gobernador tiʼ Jesusoʼ. Le oʼolal Pabloeʼ tu yaʼalaj tiʼ le j-meenoʼ: ‹Jéeobaeʼ maʼ maʼalob u yilik baʼax ka beetkiʼ›. Teʼ súutukoʼ le j-meenoʼ chʼóopchaji. Ka tu yilaj Sergio Paulo le baʼax úuchoʼ tu beetuba disipulo tiʼ Jesús.

Pablo yéetel Bernabeeʼ kʼaʼaytajnajoʼob jejeláas tuʼux: joonaj joonajil, teʼ mercadoʼoboʼ, teʼ bejoʼoboʼ yéetel teʼ sinagogaʼoboʼ. Juntéenjeakeʼ tu tsʼakoʼob juntúul máak móoch u yook tu kaajil Listra. Le máakoʼob iloʼ taakchaj u adorartikoʼob tumen tu tukloʼobeʼ diosoʼob. Letiʼobeʼ maʼ tu chaʼajoʼobiʼ, baʼaxeʼ tu yaʼaloʼob: ‹Chéen Dios unaj u adorartaʼal, toʼoneʼ chéen wíinikoʼon›. Chéen baʼaleʼ kʼuch jujuntúul judíoʼobeʼ ka tu beetoʼob u líikʼil le máakoʼob tu contra Pablooʼ. Le máakoʼoboʼ tu chʼiʼinchʼinoʼobeʼ ka tu jóoʼsoʼob paach kaaj tumen tu tukloʼob kíimi. ¡Chéen baʼaleʼ Pabloeʼ maʼ kíimiʼ! Tu séebaʼanileʼ taal jujuntúul sukuʼunoʼob áantikeʼ ka tu bisoʼob tu kaʼatéen teʼ kaajoʼ. Ka tsʼoʼokeʼ Pabloeʼ suunaj Antioquía.

Tu añoil 49, Pabloeʼ viajarnaj tu kaʼatéen utiaʼal u kʼaʼaytaj. Bin u yil le sukuʼunoʼob yaan Asia Menoroʼ, tsʼoʼoleʼ bin Europa u kʼaʼayt le baʼaxoʼob jatsʼutstak ken u beet Diosoʼ. Bin tu kaajil Atenas, Éfeso, Filipos, Tesalónica  yéetel tiʼ uláakʼ tuʼuxoʼob. Teʼ viajeaʼ láakʼintaʼab tumen Silas, Lucas yéetel tumen juntúul táankelem xiʼipal ku kʼaabaʼtik Timoteo. Letiʼobeʼ múul meyajnajoʼob utiaʼal u káajsikoʼob túumben múuchʼuliloʼob yéetel tu yáantoʼob xan utiaʼal u muʼukʼaʼankúuntik u fejoʼob. Pabloeʼ pʼáat xan año y medio Corinto utiaʼal u muʼukʼaʼankúuntik u fe le sukuʼunoʼoboʼ. Letiʼeʼ ku kʼaʼaytaj kaʼachi, ku kaʼansaj yéetel ku tsʼíibtik xan cartaʼob utiaʼal le múuchʼuliloʼoboʼ. Tsʼoʼoleʼ u meyaj kaʼacheʼ u chuyik najoʼob de nookʼoʼob. Ka máan kʼiineʼ Pabloeʼ suunaj Antioquía.

Tu añoil 52, Pabloeʼ viajarnaj tu kaʼatéen utiaʼal u kʼaʼaytaj, lelaʼ káaj u beetik Asia Menor. Ka tsʼoʼokeʼ bin xaman tak tu kaajil Filipos, tsʼoʼoleʼ kʼuch tak Corinto. Pablo xaneʼ xáanchaj táan u kaʼansaj tu kaajil Éfeso, táan u tsʼakik máakoʼob yéetel táan u yáantik le múuchʼuliloʼ. Tsʼoʼoleʼ sáamsamal ku máansik kaʼach tsoltʼaanoʼob tiʼ junpʼéel escuela, teʼ tuʼux ku muchʼkuba yaʼab máakoʼoboʼ. Yaʼab tiʼ le máakoʼoboʼ tu kʼamoʼob le baʼax tu kaʼansoʼ yéetel tu kʼexaj u kuxtaloʼob. Ka tsʼoʼok u bin tiʼ yaʼab kaajoʼob u kʼaʼayt le jatsʼuts baʼaxoʼob ken u beet Diosoʼ, Pabloeʼ bin tu kaajil Jerusalén.