Bizuubaʼ ca apóstol stiidxaʼ Jesús ne biʼniʼ predicarcaʼ ca noticia galán stiʼ Dios lu guidubi naca Guidxilayú casi maca biʼniʼ mandar Jesús gúnicabe ni. Lu iza 47, biseendaʼ ca hermanu de Antioquía Pablo ne Bernabé gúnicaʼ ti viaje de predicación. Guirópacabe biʼniʼ predicárcabe né stale gana guidubi Asia Menor, biʼniʼ predicárcabe ca binni de Derbe, Listra ne Iconio.

Biʼniʼ predicar Pablo ne Bernabé guiráʼ xixé binni: ricu ne pobre, ni nahuiiniʼ ne ni huaniisi. Stale de laacaʼ gúcacaʼ xpinni Cristu. Laaca biʼniʼ predicar Pablo ne Bernabé gobernador stiʼ guidxi Chipre ni biree lá Sergio Paulo, peru gucalaʼdxiʼ ti bruju nucueezaʼ laacabe. Ngue runi, gudxi Pablo laabe: «Zuni castigar Dios lii». Oraqueca biaana bruju que ciegu. Ora biʼyaʼ gobernador Sergio Paulo ni guca que, biʼniʼ cré ne guca xpinni Cristu.

Guiráʼ ladu zeʼ Pablo ne Bernabé biʼniʼ predicarcaʼ de yoo pur yoo, ndaaniʼ luguiaa, lu calle ne ndaaniʼ ca sinagoga. Ti biaje ndaaniʼ guidxi Listra bisiándacabe ti binni ni qué rizá. Ca binni ni biʼyaʼ ni guca que, guníʼ íquecaʼ dios laacabe ne gucaláʼdxicaʼ ñuni adorarcaʼ laacabe. Qué niná Pablo ne Bernabé ñúnicabe ngue, ne gúdxicaʼ laacabe: «¡Dios si nga naquiiñeʼ gaca adorar! Laaca binni casi laatu nga laadu». Óraque yendá caadxi judíu ne gudxítecaʼ ique ca binni que, ngue runi bichácabe guié Pablo ne guxubiyúcabe laa dede guleecabe laa fuera de guidxi que purtiʼ zacaxácabe maʼ gútibe. ¡Peru nabániruʼ Pablo! Nagueendaca yegacané caadxi hermanu laabe ne biguetanecaʼ laabe ndaaniʼ guidxi que. Despué de ngue, bibiguetaʼ Pablo guidxi Antioquía.

 Lu iza 49, biʼniʼ Pablo sti viaje. Yeguuyabe ca hermanu de Asia Menor ne despué yeguni predicarbe ca noticia galán stiʼ Dios dede ca lugar ra jma zitu stiʼ Europa. Guyebe Atenas, Éfeso, Filipos, Tesalónica ne xcaadxi guidxi. Lu viaje que yenebe Silas, Lucas ne ti jovenhuiiniʼ láʼ Timoteo. Bíʼnicabe dxiiñaʼ tobi si para gucanécabe chuʼ jma congregación ne chuʼcaʼ naguidxi. Laaca guyuu Pablo ndaaniʼ guidxi Corinto ne biaanabe raqué ti iza arondaʼ para gacanebe ca hermanu. Biʼniʼ predicarbe, bisiidibe ne bicaabe carta ra nuu stale congregación. Laaca bizaʼbe tienda de campaña purtiʼ ngue nga guca xhiiñabe. Ti tiempu despué, biguetaʼ Pablo Antioquía.

Lu iza 52, biʼniʼ Pablo guionna viaje stiʼ, primeru guyebe Asia Menor, de raqué guyebe ladu guiáʼ, yendabe Filipos, despué guyebe Corinto. Laaca biaana Pablo caadxi iza ndaaniʼ guidxi Éfeso, bisiidibe, bisiándabe binni ne gucanebe congregación que. Laaca bidiibe discursu guiráʼ dxi ndaaniʼ ti sala de conferencia stiʼ ti scuela. Stale binni bizuubaʼ diidxaʼ ne bichaacaʼ xquendanabánicaʼ. Despué de biʼniʼ predicar Pablo ca noticia galán stiʼ Dios ndaaniʼ stale guidxi, guyebe Jerusalén.