I Pilipi, onongo tye anyaka mo ma obedo angeca ma tye ki jok ma bedo i kome. Jok man onongo tiyo ki anyaka-ni me tyeto gin ma bitimme anyim, pi meno, en okelo lwak lim mapol bot luditone. I kare ma Paulo ki Cira guo i Pilipi, en obedo ka lubo korgi pi nino mapol. Jok man oweko en odange ni: “Jo man gin aye lutic pa Lubanga Mamalo Twal.” Lacen, Paulo owaco ki jok-ki ni: ‘I nying Yecu Kricito, a woko ki i kome!’ Jok oa woko ki i kom anyaka-ni.

I kare ma ludito pa anyaka-ni guniang ni gen mo me nongo lim dong oa woko ki i kome, kiniga omakogi matek adada. Gumako Paulo ki Cira ci guterogi bot lungolkop, kun giwacci: ‘Co magi gitye ka turo cik kun girubo gangwa woko ducu!’ Langolkop ociko ni kipwod Paulo ki Cira ki odoo ci kibolgi i mabuc. Lalo mabuc obologi i ot buc ma mac pe iye ci oroyo okol i tyengi.

Paulo ki Cira gubedo ka wero wer me pako Jehovah, kun lumabuc mukene giwinyo. Cutcut, i cwiny dyewor, oyengyeng oyengo te guti me ot mabuc ci doggola ducu me ot mabuc guyabbe woko cut, ki nyor me tweyo lumabuc opoto woko. Lalo mabuc oringo olaro dog ot buc ci oneno ni doggola tye twolo. En otamo ni lumabuc ducu gulwi woko, pi man en owoto pala lucwanne kun mito nekke woko kekene.

Ento Paulo odange matek ni: ‘Pe iwanne! Wan ducu watye kany!’ Lalo ot mabuc ongweco oyotoyot ci oryebbe piny i nyim Paulo ki Cira. En openyogi ni: “Myero atim ango wek alarre?” Guwaco bote ni: ‘In ki jo me odi ducu omyero wuye Yecu.’ Ci Paulo ki Cira gupwonyogi lok i kom Jehovah, ka dong lalo ot mabuc ki jo me ode gunongo batija.