I adhura mi Filipi, nyaku moko ma ng’eca ubino ku pajogi i ie. Pajogine ubed utio kude pi ninyutho lembe ma bitimere i nindo m’ubino man nyakune ubed uroyo sente lee ni ju m’ebed etimo igi. Kinde ma Paulo giku Sila gitundo i adhura mi Filipi, nyaku maeno ubed ulubo tokgi pi nindo ma dupa. Pajogine ubed uketho ekok kumae: ‘Dhanu maeni gitie jutic pa Mungu ma malu ngbir.’ E nindo acel Paulo uyero ni pajogine kumae: ‘Ang’olo iri ku nying’ Yesu, wok kud i ie!’ Pajogi ugam uwok cen kud i nyakune.

Kinde ma ju ma nyaku maeno ubed utimo igi gineno nia dong’ gibinwang’u ngo sente kendo ni kume, lembene nyayu ng’ecwiny lee i igi. E gimaku Paulo giku Sila man giterogi i wang’ jupoklembe, giyero kumae: ‘Joni gibeturo cik man gibesendo dhanu ceke mir adhura mwa.’ Jupoklembe ging’olo nia jufod Paulo giku Sila man jubolgi i odkol. Jakur odkol uroyogi i kusika mi the odkol kaka ma col bii man etwio tiendgi i bau.

Kinde ma Paulo giku Sila gibepaku Yehova ku wer, jumange ma jutwiogi kugi de gibino winjo; e mbwang’ kumeni, i diewor ma ling’, giwinjo digidi ma tek ucaku yengo odkol ceke. Dhugola odkol ugam uyabere wang’ acel man nyoro ku gin moko ci ma jutwio kogi ugony. Jakur odkol uringo i kusika man enwang’u dhoge tie thwolo, e eparu nia dhanu ceke ma jutwio gipiei, pieno eting’o palamularu kara enegere ko cen.

I saa maeno Paulo ukok kumae: ‘Kud itim lembe ma rac i kumi! Wan ceke watie!’ Jakur odkol uringo i bang’ Paulo giku Sila man epodho i the tiendgi. Epenjogi kumae: ‘Acikara nitimo ang’o kara abothi?’ Giyero ire kumae: ‘In ku juruot peri ceke, wucikuru niyio Yesu.’ I ng’eye, Paulo giku Sila giponjo lembe pa Yehova ni jakur odkol maeno ku juruot pare ceke, e gin zoo gilimo batizo.