I tison Filipi, hingonda hi hi bé nkol hi bééna mbuu mbe ikété yé. Mbuu mbe u bé ti nye ngap i pot bindéé, hala a bi boñ le i bet ba bé sélha nye ba kôs ngandak nkus. Ngéda Paul bo Silas ba bi pam i Filipi, hingonda hi, hi bi noñ bo ngandak dilo. Mbuu mbe u bé boñ le a lond le: “Bôt bana ba yé minkol mi Nyambe Nungingii.” Sôk i nsôk Paul a kal mbuu mbe le: ‘I jôl li Yésu, pam nye nyuu!’ Mbuu mbe u pam.

Ngéda bet ba hingonda ba bi yimbe le a nimis ngap yé, le a ga kuhul ha bé bo nkus, ba kala ni hiun. Ba gwel Paul bo Silas, ba kena bo bisu bi baane ba tison, ba kal le: ‘I bôt bana ba mbôk mbén, ba mpuñgul ki tison yosôna!’ Baane ba ti oda le ba bép Paul bo Silas disôô, i mbus ba leñ bo i mok. Ntat ndap mok a yibne bo i tuñ i ndap mok, i bé ikété kété ngandak, i lôôhaga ki ba jiibe, a ha ki bo dikéñ.

Paul bo Silas ba bé bégés Yéhôva ni tjémbi, bana bôt ba mok bape ba emblege. Kunda yada, i ñem u, hisi hi nyeñg ni ngui kayéle ndap mok yosôna i nyiñgha ibôdôl ngii kepam isi. Makôga ma ndap mok ma nahap, ngata ni dikéñ bi bôt ba mok bi yibla. Kiki ntat ndap mok a bi tehe hala, a jôp i ndap mok ngwéé ni ngwéé, a ada makôga ma néhi. A hoñol le bôt ba mok bobasôna ba nso, a sodol pansoñ yé i nitba.

Ha nyen Paul a lond: ‘U boñ bañ wemede béba, inyule bés bobasôna di yé hana!’ A jôp ngwéé, a kwo bisu bi Paul bo Silas. A bat bo le: “Me boñ lelaa le ndi me tohlana?” Ba timbhe nye le: ‘We ni ndap yoñ lihaa, ni hémle Yésu.’ Ha nyen Paul bo Silas ba bi niiga bo bañga i Yéhôva, kayéle ntat ndap mok, ni lihaa jé jolisôna, ba kôs sôble.