Di Pilippi, adong ma sahalak borua na boi meramal alani suru-suruan manang malaikat na jahat. Godang do hepeng dapot ni bosna alani ibana. Tingki ro si Paulus dohot si Silas tu Pilippi, diihuthon borua i ma nasida saleleng piga-piga ari. Dibahen suru-suruan na jahat i ma ibana mandok, “Angka naposo ni Debata Natumimbul i do halak on.” Ujungna, didok si Paulus ma tu suru-suruan na jahat i, ‘Di bagasan goar ni Jesus, kaluar ma ho!’ Gabe kaluar ma suru-suruan na jahat i sian borua i.

Ala ndang boi be ibana meramal, gabe muruk ma bosna. Disarat ma si Paulus dohot si Silas tu pengadilan. Didok ma, ‘Melanggar hukum do angka baoa on jala digugai do angka halak na di kota!’ Gabe dipungkuli ma si Paulus dohot si Silas jala dipenjarahon. Dibahen ma nasida di penjara na mansai golap. Dung i, dirante ma pat ni nasida.

Tingki di penjara i, dibege angka halak ma si Paulus dohot si Silas marende mamuji Jahowa. Di tonga borngin, ro ma gempa na gogo. Tarbungka ma pintu ni penjara i jala tarbungka ma rante ni pat ni nasida. Tarsonggot ma penjaga ni penjara i. Dirimpu ibana nunga lari angka tahanan i. Gabe naeng bunu diri ma ibana.

Didok si Paulus ma, ‘Unang bunu diri ho! Dison do hami sude!’ Gabe marsomba ma ibana di jolo ni di si Paulus dohot si Silas. Disungkun penjaga i ma, “Aha do sibahenonku asa malua ahu?” Didok nasida ma, ‘Ingkon porsea do ho dohot keluargam tu Jesus.’ Diajarhon si Paulus dohot si Silas ma tu nasida hata ni Jahowa. Dung i, tardidi ma penjaga penjara i dohot keluargana.