Talua kun ti kanga Filipu lɔ. Mmusu kun o i su, yɛ ɔ yi wunnzue. I sɔ’n ti’n, sran ng’ɔ di junman be sa nun’n be ɲan sika kpanngban kpa. Kɛ Pɔlu nin Silasi be juli Filipu lɔ’n, talua sɔ’n suli be su cɛli kpa. Mmusu’n yo maan ɔ kpan se kɛ: ‘Bian nga mun be ti Ɲanmiɛn m’ɔ o nglo mmua lɔ’n i sran mun.’ Kasiɛn su’n, Pɔlu seli mmusu’n kɛ: ‘Zezi dunman nun, jaso i su!’ Yɛ mmusu’n jasoli talua’n su-ɔ.

Kɛ talua’n i min mun be wunnin kɛ be su ɲanman sika kun’n, be fali ya dan kpa. Be fali Pɔlu nin Silasi be ɔli jɔlɛ difuɛ mun be ja su. Be seli jɔlɛ difuɛ mun be kɛ: ‘Bian nga mun be fɔn mmla’n, kpɛkun be yo maan klɔ’n nun sanngan.’ Jɔlɛ difuɛ mun be seli kɛ maan be bo Pɔlu nin Silasi, naan be wla be bisua. Bisua sunianfuɛ’n fa be ɔli bisua’n i klun mmuammua kpa lɔ. Lɔ’n ti tuun kpa, kpɛkun ɔ boli be kpanwun.

Bisua lɔ’n, Pɔlu nin Silasi be toli jue manmannin Zoova. Bisuafuɛ onga mun be tili. Kɔnguɛ afiɛn’n, asiɛ’n kejeli dan kpa. Bisua wunmuan’n kejeli. I anuan mun be tiketikeli. Jrɔkɔ nga be fa cili bisuafuɛ mun’n, ɔ nin be kpanwun bolɛ ninnge mun, be flo guali. Bisua sunianfuɛ’n wanndi wluli bisua’n i klun mmua lɔ, kpɛkun ɔ wunnin kɛ anuan mun be ti tikewa. Ɔ buli i kɛ bisuafuɛ mun be kwlaa b’a wanndi. I sɔ’n ti’n, ɔ fali tokofi kun naan ɔ́ fá kún i wun.

Yɛ Pɔlu seli i kɛ: ‘Nán yo ɔ wun like! E kwlaa e o wa!’ Bisua sunianfuɛ’n ɔli ndɛndɛ ko kotoli Pɔlu nin Silasi be bo. Kpɛkun ɔ usali be kɛ: “?Ngue yɛ ɔ fata kɛ n yo naan m’an fite nun-ɔn?” Be seli i kɛ: ‘Ɔ fata kɛ a nin wɔ awlofuɛ mun amun lafi Zezi su.’ I sin’n, Pɔlu nin Silasi be kannin Zoova i ndɛ’n be kleli bisua sunianfuɛ’n nin i awlofuɛ mun. Kpɛkun be yoli be kwlaa be batɛmun.