Mu Filipi, mwali umukashana umusha uwali ne cibanda. Icibanda calengele uyu umukashana alasobela ifya ku ntanshi, ici calengele alepangila abamwingishe incito indalama ishingi nga nshi. Ilyo Paulo na Sila baile ku Filipi, uyu mukashana alebakonka pa nshiku ishingi. Icibanda calengele alebilikisha ati: “Aba e babomfi ba kwa Lesa Uwapulamo.” Paulo asukile aeba icibanda ati: “Ndekwebela mwi shina lya kwa Yesu ukuti fumamo mu mukashana!” Ilyo line fye icibanda califumine mu mukashana.

Abaingishe umukashana incito balifulilwe sana ilyo baishibe ifyacitike, balishibe ukuti nomba tabakulapangilapo indalama pa mukashana. Baikete Paulo na Sila no kubakulila ku cilye, abati: ‘Aba bantu tabalekonka amafunde kabili balefulunganya sana aba mu musumba wesu!’ Bamafumu bapingwile ukuti Paulo na Sila babome ifikoti e lyo bababike na mu cifungo. Uwalelonda icifungo ababikile mu cifungo ca mukati sana umwali umwafiita kabili abakakiile amaboko na molu.

Ilyo bali mu cifungo, abafungwa bambi balekutika uko Paulo na Sila baleimba inyimbo sha kulumbanya Yehova. Nomba mu nshita ya bushiku, kwaishile icinkukuma icikalamba mu cifungo. Ifiibi fya mu cifungo fyaliswike, amacheni babakakile ku maboko na ku molu yalikakulwike. Uwalelonda icifungo alibutukileko e lyo asanga fye ifiibi na fisuka. Alemona kwati abafungwa bonse nababutuka, e ico abulile ulupanga ukuti aipaye.

Ilyo line fye Paulo abilikishe ati: ‘Wiyipaya! Bonse e mo tuli!’ Uwalelonda icifungo abutukiile mu cifungo no kuwa pa ntanshi ya kwa Paulo na Sila. Abepwishe ati: “Cinshi ningacita pa kuti mpusuke?” Bamwebele ati: ‘Iwe na ba mu ng’anda yobe mulingile ukutetekela Yesu.’ Paulo na Sila balisambilishe uwalelonda icifungo na ba mu ng’anda yakwe amashiwi ya kwa Yehova, kabili bonse balibatishiwe.