Filipi jamana na, jina dɔ tun be jɔnmuso dɔ la. O jina tun b’a kɛ o sunguru be sinikow fɔ ani o y’a to a kuntigiw ye wari caaman sɔrɔ. Tuma min na Pol ni Silasi tagara Filipi, a tugura u kɔ tile caaman kɔnɔ. O jina y’a kɛ sunguru tun be kulera ko: “Mɔgɔ nunu ye Fɛɛn bɛɛ kuntigi Ala ka baarakɛlaw ye.” A laban, Pol y’a fɔ o jina ye ko: ‘Yezu tɔgɔ barika la, ne b’a fɔ i ye, bɔ sunguru nin na.’ O jina bɔra a la.

O sunguru ka kuntigiw y’a faamu minkɛ ko a tɛna olu dɛmɛ ka wari sɔrɔ tugun, u dimina kosɔbɛ! U ye Pol ni Silasi sama ka taga n’u ye kititigɛlaw fɛ ani u y’a fɔ ko: ‘Cɛɛ nunu tɛ sariya labato ani u be dugu bɛɛ ɲagamina!’ Kititigɛlaw ye cii di k’u ka Pol ni Silasi bugɔ ani k’u don kaso la. Kasobon kɔrɔsibaga y’u don kasobon logologo dɔ la dibiba kɔnɔ ani k’u seenw don yirikuru kɔnɔ.

Pol ni Silasi tun be tandoli dɔnkiliw lara Jehova ye ani kasoden tɔɔw tun b’u lamɛnna. Dugutilama, dugukoloyɛrɛyɛrɛba dɔ barila ka kɛ ka kasobon yuguyugu. Kasobon daaw yɛlɛla, kasodenw ka jɔlɔkɔw bɛɛ tigɛra ani u seenw fonina. Kasobon kɔrɔsibaga bolila ka don kasobon logologo kɔnɔ ani a y’a ye ko daaw yɛlɛla. A tun b’a miiri ko kasodenw bɛɛ bolila. O kama, a ye murujan ta ko a b’a yɛrɛ faga.

O wagati kelen na, Pol pɛrɛnna ko: ‘I kana foyi kɛ i yɛrɛ la, an bɛɛ be yan.’ Kasobon kɔrɔsibaga bolila ka don ani a y’a kunbiri gwan Pol ni Silasi kɔrɔ. A y’u ɲininga ko: “Ne ka kan ka mun kɛ janko ka kisi?” U y’a jaabi ko: ‘E n’i somɔgɔw ka la Yezu.’ O kɔ, Pol ni Silasi y’u kalan Jehova ka Kuma na ani kasobon kɔrɔsibaga n’a somɔgɔw bɛɛ batizera.