Enyene ofụn an̄wan kiet ke Philippi emi ekenyenede demon. Enye ama esida odudu demon oro etịn̄ se iditịbede onyụn̄ an̄wana ata ediwak okụk ọnọ mme eteufọk esie. Ke ini Paul ye Silas ẹdide ẹdisịm Philippi, enye ama esitiene mmọ ke edem kpukpru usen. Demon oro ama esinyụn̄ anam enye esifiori ete: ‘Ẹse ifịn Ata Edikon̄ Abasi mi.’ Usen kiet Paul ama ọdọhọ demon oro ete: ‘Mmowụk fi ke enyịn̄ Jesus nte ọwọrọ enye ke idem!’ Demon oro ama ọwọrọ.

Mbon emi ẹkesidade eyen oro ẹn̄wana okụk ẹma ẹyat esịt etieti sia mmọ ẹma ẹdiọn̄ọ ke mbubehe mmimọ abiara. Mmọ ẹma ẹdụri Paul ye Silas ẹka iso mme ekpeikpe ẹkedọhọ ẹte: ‘Owo iba emi ẹsan̄a ẹbiat ibet ẹnyụn̄ ẹsịn ntịme ke ofụri obio emi!’ Mme ekpeikpe ẹma ẹdọhọ ẹmia Paul ye Silas ẹnyụn̄ ẹmen mmọ ẹkesịn ke ufọk-n̄kpọkọbi. Ekpeme ufọk-n̄kpọkọbi ama emen mmọ ekesịn ke esịt esịt ufọk-n̄kpọkọbi emi ekịmde etieti onyụn̄ esịn mmọ ke ebuka.

Ekem Paul ye Silas ẹma ẹtọn̄ọ ndikwọ itoro nnọ Jehovah. Mbon n̄kpọkọbi ẹma ẹnyụn̄ ẹkpan̄ utọn̄. Ke ufọt okoneyo oro, inikiet inikiet isọn̄ ama ọtọn̄ọ ndiyek ọkpọsọn̄. Kpukpru usụn̄ ufọk-n̄kpọkọbi ẹma ẹberede ẹna in̄wan̄, n̄kpọkọbi ye ebuka onyụn̄ ọkpọhọde mbon n̄kpọkọbi ke ubọk ye ukot. Ekpeme ufọk-n̄kpọkọbi ama efehe odụk ata esịt esịt ufọk-n̄kpọkọbi okokụt ke usụn̄ ana in̄wan̄. Enye ama osio akan̄kan̄ oyom ndiwot idem sia enye ekekere ke mbon n̄kpọkọbi ẹfen̄e.

Paul ama ofiori ete: ‘Kûwot idem! Kpukpru nnyịn mi!’ Enye ama efehe ọkọduọ Paul ye Silas ke ukot onyụn̄ obụp mmọ ete: ‘Nso ke n̄kpanam man ẹnyan̄a mi?’ Mmọ ẹma ẹdọhọ enye ẹte: ‘Ana afo ye ikọt ufọk fo ẹbuọt idem ye Jesus.’ Paul ye Silas ẹma ẹkpep enye ye ikọt ufọk esie ikọ Abasi, mmọ ẹnyụn̄ ẹna baptism.