Z Philippi lebt es Meitli, wo e Dienerin isch. Ihri Scheffe verdiened vil Geld mit ihre, wil si cha d Zuekunft vorussäge. Si cha das nume, wil si en Dämon i sich inne het. Wo de Paulus und de Silas z Philippi sind, lauft ihne das Meitli tagelang hindenache. De Dämon macht, dass si rüeft: «Die Männer sind Sklave vom höchschte Gott.» Irgendwenn wirds em Paulus z vil und er befihlt em Dämon: «Im Name vo Jesus, chumm us dem Meitli use!» Sofort gaht de Dämon us ihrem Körper use.

Ihri Scheffe merked glii emal, dass si jetzt kei Geld meh mit ihre chönnd verdiene und werded verruckt. Si schlepped de Paulus und de Silas zu de höchschte Beamte und säged zu ihne: «Die Männer halted sich nid a s Gsetz und bringed d Lüt i de Stadt ganz durenand!» Di Beamte gebed denn de Befehl, dass de Paulus und de Silas müend gschlage und iigsperrt werde. De Gfängniswärter steckt si i hinterscht und dunklischt Egge im Gfängnis und tuet ihri Füess zwüsche zwei Holzblöck iibschliesse.

Wos Mitternacht isch, singed de Paulus und de Silas Lieder für Jehova und di andere, wo im Gfängnis sind, losed zue. Plötzlich gits es heftigs Erdbebe und s Gfängnis wird vo obe is unde duregschüttlet. D Gfängnistüre spicked uf, au d Chettine und d Holzblöck vo de Gfangene gheied ab. De Wärter springt ine und gseht, dass alli Türe offe sind. Er meint, di Gfangene seiged abghaue, und drum nimmt er es Schwert und wett sich umbringe.

De Paulus rüeft grad: «Mach das nid! Mir sind ja alli da!» De Wärter lauft grad uf de Paulus und de Silas zue und gaht vor ihrne Füess a Bode. Er fragt si: «Was muess ich mache, dass ich cha grettet werde?» Si gebed ihm zur Antwort: «Glaub a Jesus, du und dini ganzi Familie.» Si verzelled ihm vo Jehova und vo sim Wort. De Wärter und alli, wo i sim Huus wohned, lönd sich denn la taufe.