MoFilipi mwa ri omusuko omukarere ngwa ri nombepo ohakohoke. Omusuko ngwa ri nombepo ohakohoke ngwi wa ri ombuke, nu aa tumbisa ovahona ve. Indu Paulus na Silas tji ve ya koFilipi, omusuko ngwi ee ve kongorere akuhe kaa vei oure womayuva omengi. Ombepo ohakohoke ndji ya tjita kutja ma ravaere kutja, “Ovandu mba ovakarere vaNdjambi wOkombandambanda!” Korusenina Paulus wa raera kombepo ohakohoke ndja ri momusuko ngwi na tja: ‘Mena raJesus, pita mu ye!’ Ombepo ya pita momusuko.

Ovahona vomusuko ngwi tji va muna kutja kave nakuyenena okumuna ovimariva mokuuka kwe, owo va pindika tjinene. Owo va twara Paulus na Silas kotjombanguriro nave tja: ‘Ovarumendu mba mave teya omatwako nu mave tjiti ezunganeno motjihuro atjihe!’ Otjombanguriro tja rakiza kutja Paulus na Silas ve tonwe okuzambo ve yumbwe mondeko. Omutjevere wondeko we ve yumba moruveze orukotokoto mondeko nu ndwa ri nonḓorera tjinene neve pandeke.

Ngunda ovakamburwa varwe amave puratene, Paulus na Silas va imburira Jehova omatangero. Tjimanga mokati kouṱuku, kwa tjitwa omanyinganyingiro wehi omanamasa nga kurakurisa ondeko aihe okuza kombanda nga kehi. Omivero vyondeko vya paturuka, nu ouketanga mbwa pandekere ovakamburwa wa kutuka ouini. Omutjevere wondeko wa hakahana okuhita moukoto wondeko na munu omivero avya paturuka. Tja muna kutja ovakamburwa avehe va hene, eye wa toora enga kutja me rizepe.

Nu tjimanga Paulus wa ravaera na tja: ‘O rizepa! Atuhe omu tu ri!’ Omutjevere wondeko wa hakahana na kawira pehi komurungu waPaulus na Silas. Eye we ve pura na tja: “Hi tjite vi kutja mbi hupisiwe?” Owo va tja ku ye: ‘Kambura mu Muhona Jesus, nove nonganda yoye mamu hupisiwa.’ Okuzambo Paulus na Silas ve ve honga embo raJehova, nu omutjevere wondeko neṱunḓu re arihe va papitisiwa.