Ba Pilipi, bisi seiku indu ulun ke dirasuk roh jai. Roh jai nya ngena iya betilitka nasit, lalu tu nulung indu nya bulih mayuh duit ke tuan iya. Lebuh Paul enggau Silas datai ba Pilipi, indu nya nitih seduai iya beberapa hari. Roh jai ngasuh indu nya manjung: ‘Orang tu nembiak Petara ti Pemadu Tinggi.’ Pengujung iya, Paul madah ngagai roh jai nya: ‘Dalam nama Jesus, pansut nuan ari iya!’ Roh jai nya lalu pansut ari indu nya.

Lebuh tuan indu nya nemu sida enda ulih ngena indu nya ngulihka duit, sida balat ringat. Sida ngirit Paul enggau Silas ngagai bala hakim, lalu madah: ‘Seduai tu enda nitihka adat lalu ngaga pengachau ba nengeri tu!’ Bala hakim merintah Paul enggau Silas disipat lalu dikurung ba rumah jil. Jejaga rumah jil nya ngurung seduai iya ba bilik jil ti pemadu dalam lalu nganchin seduai iya ngena kanchin kayu.

Lebuh Paul enggau Silas belagu muji Jehovah, orang jil ke bukai mending. Enda mukai-mukai, ba urung tengah malam, tanah berenyang ti balat nyadi nyentukka rumah jil nya nyau begelegar. Pintu jil tebuka, lalu rantai enggau kanchin kayu semua orang jil mega tebuka. Jejaga rumah jil beguai-guai ngagai bilik jil ti pemadu dalam lalu meda pintu udah tebuka. Ketegal iya ngumbai semua orang jil udah ngelepaska diri, iya ngambi pedang deka munuh diri.

Tekala nya, Paul ngangauka iya: ‘Anang ngemediska diri! Semua kami bisi ditu magang!’ Jejaga nya beguai tama lalu nyungkurka diri ba kaki Paul enggau Silas. Iya nanya seduai iya: ‘Nama patut dikereja aku ngambika ulih selamat?’ Seduai nyaut iya: ‘Nuan enggau diri sebilik patut arapka Jesus.’ Paul enggau Silas lalu ngajar sida pasal jaku Jehovah. Udah nya, jejaga nya enggau diri sebilik iya dibaptisa.