Hpilipi mare hta nat shung ai mayam numsha langai nga ai. Shi gaw madu ni gumhpraw law law shang hkra, nat a karum shingtau lam hte gumhpan hpan ai. Hpilipi mare de Pawlu yan Sila du ai shaloi, shi gaw nhtoi law law shanhte hpang hkan nang ai. Nat gaw dai numsha hpe ndai hku marawn hkra shadut ya ai: ‘Ndai ni gaw Tsaw Htum ai Karai Kasang a shangun ma ni re.’ Dai majaw, Pawlu gaw nat hpe ndai hku tsun dat ai: ‘Yesu Hkristu a mying ningsang hte ngai tsun na. Shi kaw na pru mat u!’ Shaloi, nat gaw dai numsha kaw na pru mat wa ai.

Dai numsha a madu ni gaw, shanhte a matu dai numsha gumhpraw n tam ya lu sai hpe, chye mat ai shaloi grai pawt ai. Dai majaw, shanhte gaw Pawlu yan Sila hpe mare up ai ni hpang de shaga sa nna, ndai hku tsun ai: ‘Ndai masha ni gaw upadi tawt lai nna, mare ting hpe kasu kabrawng wa hkra galaw nga ai!’ Mare up ai ni gaw, Pawlu yan Sila hpe kayat nna htawng jahkrat na matu matsun dat ai. Htawng agyi wa gaw shan hpe sin mak ai jut jahtum na htawng gawk kata hta sharen da ai.

Yehowa hpe Pawlu yan Sila shakawn kungdawn ai nsen hpe htawng hkrat nga ai kaga bawng masha ni na ma ai. Shana yuptung hta, akajawng sha nnang nawn kaba nawn wa ai majaw, htawng ting ashun mat ai. Dai majaw, htawng chyinghka ni hpaw malang mat nna, bawng masha ni hpe gyit hkang da ai hpri sumri ni raw mat ai. Htawng agyi wa gaw htawng gawk kata de shang yu yang, htawng chyinghka ni hpaw nga ai hpe mu dat ai. Dai majaw, bawng masha ni lawt mat sai ngu shadu nna, shi hkum shi sat si na matu shakut wa ai.

Shaloi jang, Pawlu gaw ndai hku marawn dat ai: ‘Na hkum nang dai hku hkum galaw! Anhte yawng ndai kaw nga taw ai!’ Htawng agyi wa gaw gawk kata de shang wa nna, Pawlu yan Sila hpe sa dingnyawm ai. Shi gaw shan hpe ndai hku san ai: ‘Ngai hkye hkrang la hkrum na matu hpa galaw ra na kun?’ Shan ndai hku bai tsun ai: ‘Nang hte na nta masha ni gaw Yesu Hkristu hpe kamsham ra ai.’ Pawlu yan Sila gaw shanhte hpe Yehowa a mungga sharin ya ai. Dai hpang, htawng agyi hte shi a nta masha yawng hkalup hkam wa ma ai.