Na Filipi, kuvandaka ti mpika mosi ya nkento yina vandaka ti demo. Demo yina vandaka kusadila mwana-nkento yina sambu na kuzabisa bantu mambu yina ta kumina bo, mpi yandi vandaka kusadila bamfumu na yandi mbongo mingi na mutindu yina. Ntangu Polo ti Silasi kumaka na Filipi, mwana-nkento yina landaka bo bilumbu mingi. Demo vandaka kupusa yandi na kutuba na ndinga ya ngolo nde: “Bantu yai kele bampika ya Nzambi ya Kuluta Zulu.” Nsuka-nsuka, Polo tubilaka demo yina nde: ‘Na zina ya Yezu, basika na kati na yandi!’ Ebuna demo yina basikaka.

Ntangu bamfumu ya mwana-nkento yina bakisaka nde yandi ta sadila bo diaka ve mbongo, bo waka makasi mingi. Bo kangaka Polo ti Silasi mpi bo nataka bo na bazuzi ya mbanza, mpi bo tubaka nde: ‘Bantu yai ke fwa nsiku mpi ke tula mavwanga na mbanza ya mvimba!’ Bazuzi songaka bantu na kubula Polo ti Silasi mpi na kutula bo na boloko. Muntu ya ke kengilaka boloko kotisaka bo na kati kibeni ya boloko, na kisika ya mudidi mpi kangaka makulu na bo na mabaya.

Ntangu bantu ya nkaka ya boloko vandaka kuwidikila, Polo ti Silasi vandaka kuyimba bankunga ya kukumisa Yehowa. Na mbala mosi, na kati-kati ya mpimpa, ntoto nikanaka ngolo mpi boloko nikanaka katuka na nsi tii na zulu. Bakielo ya boloko kangukaka, mpi bashene ti mabaya yina bo kangaka bantu ya boloko kangukaka. Muntu ya ke kengilaka boloko kwendaka ntinu na kati-kati ya boloko mpi monaka bakielo ya kukanguka. Sambu yandi yindulaka nde bantu ya boloko me tina, yandi bakaka mbele ya bitumba sambu na kudifwa.

Na ntangu yina, Polo tubaka na ndinga ya ngolo nde: ‘Kudisala ve mbi! Beto yonso kele awa!’ Muntu ya ke kengilaka boloko kotaka nswalu mpi fukamaka na ntwala ya Polo ti Silasi. Yandi yulaka bo nde: “Mono fwete sala nki sambu na kuguluka?” Bo songaka yandi nde: ‘Nge ti dibuta na nge, beno fwete kwikila na Yezu.’ Ebuna Polo ti Silasi longaka bo ndinga ya Yehowa, mpi muntu ya ke kengilaka boloko mpi dibuta na yandi ya mvimba bakaka mbotika.