Mu mbanza ia Filipe mua kexile mubhika, ka kilumba, ua kexile ni dimonho moxi diê. O dimonho dia kexile mu bhangesa o kilumba kuzambula, o jingana jê ja kexile mu nganhala kitadi kiavulu. Kioso Phaulu ni Sila kiendele mu mbanza ia Filipe, muene ua kexile mua kaiela mu izuua iavulu. O dimonho dia mu bhangesele kudikola: “Mala iá jiselevende ja Nzambi ukôla.” Mu kusuka-ku, Phaulu ua vutuila o dimonho, uixi: ‘Nga ku tumu mu dijina dia Jezú, tunda mu mukutu uê!’ Bhenhobho o dimonho dia tundu mu mukutu ua kilumba.

Kioso o jingana ja kilumba, kia mono kuila keji tena kunganhala dingi kitadi, njinda iá a kuata. A koko Phaulu ni Sila katé ku afundixi, exi: ‘Mala iá ka mu belesela o kitumu, a mu tatesa kiavulu o mbonge ietu!’ O afundixi a tumu kubeta Phaulu ni Sila ni ku a jikila mu kaleia. O mulangidi ua kaleia ua a tula ku hotélele lua kaleia, o inama iâ ua i kutu mu itutu.

Phaulu ni Sila akexile mu kuimba mu kuximana Jihova, athu a mukuá mu kaleia akexile mu kuivua. Mu kaxi ka usuku, kua moneka kitungutu kia tungutisa o kaleia koso katé ku madisesa. O mabhitu a kaleia a jikuka, o jipelezu joso ja jituka ku malubhambu. O mulangidi ua kaleia uai ni lusolo-luoso katé moxi ia kaleia, ua sange kuila mabhitu moso a jikukile. Mu kubanza kuila jipelezu joso ja lengele, ua sungu o xibhata phala kudijibha.

Bhenhobho Phaulu ua dikola: ‘Kana kudijibha! Etu bhabha!’ O mulangidi ua kaleia uai ni lusolo katé bhua kexile Phaulu ni Sila anga u fukama. Ua ebhuidisa: “Ihi i nga tokala o kubhanga phala ngi tene kubhuluka?” A mu tangela: ‘Eie ni dibhata dié dioso mua tokala kuxikina Jezú.’ Phaulu ni Sila anga a a longo o mak’â Jihova, o mulangidi ua kaleia ni dibhata diê dioso a a batizala.