Wan slev titi bin de na Filipay we gɛt dimɔn. Di dimɔn bin de yuz di titi fɔ tɛl pipul dɛn wetin go apin tumara bambay, ɛn i bin de mek bɔku mɔni fɔ di wan dɛn we gɛt am. We Pɔl ɛn Saylas kam na Filipay, di titi fala dɛn ɛnisay we dɛn bin de go fɔ sɔm dez. Di dimɔn mek di titi ala se: “Dɛn man ya na slev dɛn fɔ di Gɔd we De Pantap Ɔlman.” Faynali, Pɔl tɛl di dimɔn se: ‘Insay Jizɔs in nem, kɔmɔt insay am!’ Di dimɔn lɛf di titi.

We di wan dɛn we gɛt di titi kam fɔ no se dɛn nɔ go ebul yuz am igen fɔ gɛt mɔni, dɛn vɛks bad bad wan. Dɛn drɛg Pɔl ɛn Saylas, kɛr dɛn go to di sivul majistret dɛn ɛn tɛl dɛn se: ‘Dɛn man ya nɔ de obe di lɔ ɛn dɛn de ambɔg di wan ol siti!’ Di majistret dɛn mek dɛn bit Pɔl ɛn Saylas ɛn put dɛn na prizin. Di wan dɛn we de gayd di jelman dɛn put Pɔl ɛn Saylas na di say we dak pas ɔl na di prizin, ɛn dɛn lɔk dɛn fut dɛn midul ebi bod dɛn we gɛt ol fɔ put fut.

Pɔl ɛn Saylas siŋ prez dɛn to Jiova ɛn di ɔda jelman dɛn bin de lisin. Wantɛm wantɛm, wan pawaful atwek shek di prizin midul nɛt frɔm ɔp te go dɔŋ. Di prizin domɔt dɛn opin, ɛn di jelman dɛn chen dɛn kɔt. Di man we de gayd di jelman dɛn rɔn go insay di prizin, ɛn i si di domɔt dɛn ɔl opin. I tek sɔd fɔ kil insɛf bikɔs i bin shɔ se ɔl di jelman dɛn dɔn rɔnawe.

Na de Pɔl tɛl am se: ‘Nɔ kil yusɛf! Wi ɔl de na ya!’ Di man we de gayd di jelman dɛn rɔn go butu bifo Pɔl ɛn Saylas. I aks dɛn se: “Wetin a fɔ du fɔ mek a sev?” Dɛn tɛl am se: ‘Yu ɛn di wan dɛn na yu os nid fɔ biliv pan Jizɔs. Dɔn Pɔl ɛn Saylas tich dɛn bɔt Jiova, ɛn di man we de gayd di jelman dɛn baptayz wit ɔl di wan dɛn na in os.