လၢ​ဝ့ၢ်​ဖံလံးပံၤ​အ​ပူၤ​န့ၣ် ကုၢ်​ပိာ်မုၣ်​အိၣ်ဝဲ​တဂၤ​လီၤ. ခီဖျိ​လၢ​တၢ်နါ​အိၣ်​လၢ ပိာ်မုၣ်​ဖိ​အံၤ​အလိၤ​အဃိ အဝဲ​ဃုစ့​လၢ​အ​ကစၢ်​တဖၣ်​အဂီၢ်​န့ၢ်​အါမး​လီၤ. ဖဲ​စီၤ​ပီလူး​ဒီး​စီၤ​စံလၤ လဲၤ​လၢ​ဝ့ၢ်​ဖံလံးပံၤ​အခါ ပိာ်မုၣ်​အံၤ​လဲၤပိာ်​အဝဲသ့ၣ်​အခံ တဘျုး​သီ​ညါ. ဒီး​တၢ်နါ​မၢ​ပိာ်မုၣ် ကိးပသူ​ထီၣ်​လၢ– “အဝဲသ့ၣ်​တဖၣ်​အံၤ မ့ၢ်​တၢ်​ထီကတၢၢ်​ယွၤ​အခ့အပှၤ” လီၤ. လၢခံ​စီၤ​ပီလူး​တဲဘၣ် တၢ်နါ​လၢ– ‘လၢ​ယ့ၣ်ၡူး​အ​မံၤ ဟးထီၣ်​ကွံာ်​လၢ ပိာ်မုၣ်​အလိၤ​တက့ၢ်.’ တၢ်နါ​န့ၣ် ဟးထီၣ်​ဝဲ​လၢ ပိာ်မုၣ်​အလိၤ​လီၤ.

ဖဲ​ပိာ်မုၣ်​အံၤ​အ​ကစၢ်​တဖၣ် သ့ၣ်ညါ​ဝဲ​လၢ​အဝဲသ့ၣ် ဃုစ့​တ​န့ၢ်​လၢၤဘၣ်​အခါ အဝဲသ့ၣ်​သးပှံၢ်​ထီၣ်​တၢ်​ဒိၣ်မး​လီၤ. အဃိ ပိာ်မုၣ်​အ​ကစၢ်​တဖၣ်​အံၤ​လဲၤ​တွံၢ် စီၤ​ပီလူး​ဒီး​စီၤ​စံလၤ​လၢ ကီၢ်​ပဒိၣ်​တဖၣ်​အ​အိၣ် ဒီး​တဲဝဲ​လၢ– ‘ပိာ်ခွါ​တဖၣ်​အံၤ မၤ​ကမၣ်​တၢ်သိၣ်​တၢ်သီ ဒီး​မၤ​တၢထီၣ်​တၢလီၤ​တၢ်​လၢ ဝ့ၢ်​ပူၤ​ဒီဖျၢၣ်​ညါ.’ ကီၢ်​ပဒိၣ်​တဖၣ် မၢ​ပှၤ​တီၢ်​စီၤ​ပီလူး​ဒီး​စီၤ​စံလၤ ဒီး​ပၢ​နုာ်လီၤ​အဝဲသ့ၣ်​လၢ ဃိာ်ပူၤ​လီၤ. ဝံၤဒီး​ပှၤ​ပၢၤ​ဃိာ်​တဂၤ ပၢ​နုာ်လီၤ​အဝဲသ့ၣ်​လၢ တၢ်ပူၤ​လၢ​အယိာ်​ကတၢၢ် လၢ​တၢ်ခံး​ကျါ​ဒီး​ပှၤ​ကျီၤ​ဃာ်​အဝဲသ့ၣ်​လၢ သ့ၣ်ကျီၤ​တဖၣ် (ထိပ်တုံး) လီၤ.

ဖဲ​မုၢ်နၤခီ​အဆၢ​ကတီၢ်​န့ၣ် စီၤ​ပီလူး​ဒီး​စီၤ​စံလၤ သးဝံၣ်​စံးထီၣ်​ပတြၢၤ ယဟိဝၤ​ယွၤ​ဒီး ပှၤ​ဃိာ်​ဖိ​အဂၤ​တဖၣ် ဒိကနၣ်​ဝဲ​လီၤ. လၢ​တၢ်​တ​ပာ်သူၣ်​ပာ်သး​အ​ပူၤ ဟီၣ်ခိၣ်​ဟူးဝးဝဲ​ဖးဒိၣ်​အဃိ ဃိာ်​အ​ပဲတရီ​အိးထီၣ်​အသး​ဒီး ပှၤ​ဃိာ်​ဖိ​တဖၣ်​အ​ပျံၤထး​လီၤဃဲၣ် ဒီး​အ​သ့ၣ်ကျီၤ​လီၤဖျုဝဲ​လီၤ. ဖဲ​န့ၣ်​အခါ ပှၤ​ပၢၤ​ဃိာ်​တဂၤ လဲၤ​ဃ့ၢ်​ကွၢ်ဝဲ​ပှၤ​ဃိာ်​ဖိ​ဒီး ထံၣ်ဘၣ်​ဝဲ​လၢ​ဃိာ်​အ​ပဲတရီ​တဖၣ်​အိးထီၣ်​အသး​လီၤ. အဃိ အဝဲ​ဆိကမိၣ်​ဝဲ​လၢ ပှၤ​ဃိာ်​ဖိ​တဖၣ်​ဃ့ၢ်ကွံာ်​လၢာ်​လံ. ဖဲ​န့ၣ်​န့ၣ် အဝဲ​ထုးထီၣ်​အ​ဒီ​ဒီး က​မၤသံ​လီၤ​အ​နီၢ်ကစၢ် အသး​လီၤ.

ဖဲ​န့ၣ်​အဆၢ​ကတီၢ် စီၤ​ပီလူး​ကိးပသူ​ထီၣ်​လၢ– ‘မၤသံ​လီၤ​န​သး​တဂ့ၤ, ပ​အိၣ်​ဖဲ​အံၤ​ခဲလၢာ်​လီၤ.’ ပှၤ​ပၢၤ​ဃိာ်​တဂၤ​အံၤ ကရီ​လဲၤနုာ်​လီၤ​ကွၢ်ဝဲ​ဒီး ထိၣ်လီၤပှီၤ​အသး​လၢ စီၤ​ပီလူး​ဒီး​စီၤ​စံလၤ အမဲာ်​ညါ​လီၤ. ပှၤ​ပၢၤ​ဃိာ်​တဂၤ​အံၤ သံကွၢ်​အဝဲသ့ၣ်​လၢ– ‘ဒ်သိး​ယ​က​န့ၢ်​တၢ်​အုၣ်က့ၤ​ခီၣ်က့ၤ​အဂီၢ်, ယ​က​ဘၣ်​မၤ​ဒ်လဲၣ်.’ စီၤ​ပီလူး​ဒီး​စီၤ​စံလၤ တဲဘၣ်​အီၤ​လၢ– ‘နၤ​ဒီး​န​ဟံၣ်ဖိ​ဃီဖိ က​ဘၣ်​စူၢ်က့ၤ​နာ်က့ၤ​ယ့ၣ်ၡူး​လီၤ.’ ဝံၤဒီး​စီၤ​ပီလူး​ဒီး​စီၤ​စံလၤ သိၣ်လိ​အဝဲသ့ၣ် ယဟိဝၤ​ယွၤ​အ​ကလုၢ်​ကထါ​လီၤ. ဒီး​ပှၤ​ပၢၤ​ဃိာ်​တဂၤ​အံၤ ဒီး​အဟံၣ်​ဖိ​ဃီဖိ​ခဲလၢာ်​န့ၣ် ဒိးဘျၢ​အသး​လၢ​ထံလီၤ.