MoFilipi, mwa kere mukadona gomupika ogu ga kere nompepo zondona. Mpepo zondona ngazi mu ruganesa a kare mupumbi, ntani nga kongere vahekuru vendi emona. Apa Paurusa naSirasa va zire moFilipi, age nga va kwama-kwama mazuva gomanzi. Mpepo zondona tazi mu ninkisa a zigire asi: “Vagara ava vantu vaKarunga gomunene po.” Paurusa makura ta tantere mpepo zondona asi: ‘Medina lyaJesus, tunda mo mwendi!’ Makura tazi mu tundu.

Vahekuru vendi apa va dimbwilire asi kapi ana kuvakongera hena yimaliwa, tava handuka unene. Tava twara Paurusa naSirasa kovaporosi, nokutanta asi: ‘Vantu ava kuteza po veta nokureta ndjorongani mositata!’ Vaporosi tava panga asi Paurusa naSirasa va va toone nokuvatura modorongo. Munomeni godorongo ta va twara mokanzugo komundema gopokatji kodorongo, ta va tura mokakunzu.

Paurusa naSirasa tava dimbi nokuhamberera Jehova, awo vanadorongo vakwawo kuna kupurakena. Mokatji komasiku, va liharuka ko evhu kuna kukankama nokunyunganga makuma godorongo kutundilira keguru dogoro pevhu. Mavero godorongo taga zeguruka, yipandeko kuna kugwaagwa ko kovanadorongo. Munomeni ta dukire modorongo zokonhi ta ka gwana mavero gana zeguruka. Ta gazara asi nampo vanadorongo vana pwaga mo, ta gusa rufuro asi a lidipage.

Paurusa ta zigire asi: ‘Wa ha lidipaga! Natuvenye motuli!’ Munomeni ta hwilire monzugo ezi ga kere Paurusa naSirasa ta ligandere konompadi dawo. Ta va pura asi: ‘Yisinke nani rugana ni paruke?’ Tava mu limburura asi: ‘Nove nepata lyoge mwa hepa kupura mwaJesus.’ Paurusa naSirasa makura tava rongo munomeni nepata lyendi nonkango daJehova nokuvakuhwa.