Mwa Filipi, nekunani musizana wa mutanga yanaanani mudimona. Mudimona wo neutahisanga kuli musizana yo alaule, mi naafumisanga malenaa hae ka nzila yeo. Paulusi ni Silasi hane batile mwa Filipi, musizana yo abalatelela kone baya kaufela ka mazazi amañata. Mudimona wa kukueza musizana yo kuhuwa kuli: “Batu ba ki batanga ba Mulimu Yapahami ka Kufitisisa.” Kwa mafelelezo, Paulusi abulelela mudimona wo kuli: ‘Ka libizo la Jesu, zwa ku yena!’ Mudimona wo wazwa ku musizana.

Bañi ba musizana hane balemuhile kuli naatuhezi kubafumanela masheleñi, nebafilikani hahulu. Bahohela Paulusi ni Silasi kwa bazamaisi ba sicaba, mi bali: ‘Baana ba baloba mulao mi banyemisa batu mwa tolopo kaufela!’ Bazamaisi ba sicaba balaela kuli Paulusi ni Silasi banatiwe ni kubeiwa mwa tolongo. Mulibeleli wa tolongo abakenya mwa tolongo ye kwatasi hahulu, yenani lififi mi ababeya mwa makulo.

Paulusi ni Silasi baopelela Jehova lipina za milumbeko, mapantiti babañwi inze bateeleza. Honafo, fahalaa busihu, kwaezahala zikinyeho yetuna mi yanyanganyisa tolongo kaufela. Minyako ya tolongo yakwaluha, mi mawenge anaatamilwe mapantiti ni makulo zatamuluha. Mulibeleli wa tolongo amatela mwa sitokisi sa mwahali mi ayo fumana kuli minyako ikwaluhile. Ka kunahana kuli mapantiti kaufela batobile, aanga mukwale kuli aipulaye.

Honafo feela, Paulusi ahuwa, ali: ‘Usike waikolofaza!’ Kakuli kaufelaa luna luteñi mo!’ Mulibeleli wa tolongo amatela mwahali miawela fapilaa Paulusi ni Silasi. Ababuza kuli: “Nilukela kuezañi kuli nipiliswe?” Bamubulelela kuli: ‘Wena ni ba ndu yahao mulukela kulumela ku Jesu.’ Paulusi ni Silasi babaluta linzwi la Jehova, mi mulibeleli wa tolongo ni ba ndu yahae kaufela bakolobezwa.