Filipos tamë nety tuˈugë kiixy diˈib xëwëj xëmaapy mët ko tyuktëjkë kaˈoybyë. Kajaa ijty dyajmeenybyaaty ja wyintsënëty. Ko Pablo mëdë Silas jyäjttë Filipos, ta pyatsoˈonëdë ets kanäk xëëw pyajëdijtëdë. Ets ja kaˈoybyë yëˈë diˈib yajˈyaxkakë: “Tyäˈädë yetyëjkëty yëˈë tuumbëˈäjttëdëbë Dios diˈib mëj ijtp”. Ok, ta Pablo tˈanmääy ja kaˈoybyë: “¡Nˈanmaapy xyëëwgyëjxmë Jesus ets xytyukpëtsëëmduˈudëdë tadë kiixy!”. Ta ttukpëtsëëmduty.

Ko ja kiixyë wyintsënëty tˈijxtë ko kyaj yˈokmeenybyäädanë, ta jyantsy jyotˈambëjktë. Ta ja Pablo mëdë Silas axëëk yajtuundë ets ojts yajmënëjkxtë mä ja yajkutujkpëty etsë wintsënëty, ta yˈanmääyëdë: “¡Tyäˈädë yetyëjkëty kyaj tmëmëdowdë ja ley ets yajmäˈttëbë nax käjpn!”. Ja wintsëndëjk ta ojts tniˈanaˈamëdë parë yajtsiik yajkoxëdë Pablo mëdë Silas ets yajtsumdët. Ta ja diˈib nyiwintsënˈäjtypyë pujxndëjk, ojts pyëjtäˈägëdë axtë ogäjp mä jeˈeyë jantsy koots puknë. Nan, yajpëjtaktë mä tuˈugë kepy diˈib tuktsajtstuˈuty mä tyeky yaˈˈamaˈtmujktë mëdë tääblë.

Ta netë Pablo mëdë Silas tyëjkëdë ëëw yaxpë parë tkuyˈëëwdë Jyobaa ets tmëdoowˈittë ja wiinkpë tsumyjyaˈay. Ko ajotkumonë tsuˈumgujkm nyajxy ja mëk ujx. Ta yˈawatstääy ja pujxndëjkˈääw ets kyäˈädääy ja kadenë ets ja tääblë mä nety të yaˈˈamaˈtmuktë ja tyeky. Ta ja pujxndëjk kuentˈäjtpë pëyeˈegyë ojts nyijkxy mä nety ja Pablo mëdë Bernabé të yajpëjtäˈäktë ets ta tˈijxy ko awäˈätsë nety ja tëjkˈääw. Ta wyinmääy ko të kyaktäˈäytyë ja pujxndëjkjäˈäy, ta tkäjpëˈky tuˈugë espäädë parë nyayaˈooganë.

Tamë nety tyimnayaˈooganënë, ko Pablo myëyaxkakë: “¡Këdii wiˈix mnaytyunyëty! ¡Tyapëts niˈamukëty!”. Ta ja pujxndëjk kuentˈäjtpë pëyeˈegyë ojts tninëjkxyë Pablo mëdë Silas ets nyaygyoxtënääytyakë. Ta dyajtëëy: “¿Tits ndunëp parëts nitsoˈogët?”. Ta Pablo mëdë Silas yˈatsoowëdë: “Mijts mëdë mfamilyë tsojkëp xymyëbëktëdë Jesus”. Ta netë Pablo mëdë Silas ttukniˈˈijxëtsyondaktë Diosë yˈayuk, ets ta ja pujxndëjk kuentˈäjtpë mët niˈamukë fyamilyë nyëbajttë.