Ilo Pilippai, ear wõr juon jiroñ me ej rũkõm̦akoko im juon jetõb ettoon ear del̦o̦ñ ñan ippãn. Jetõb ettoon in ear kõjerbale jiroñ in bwe en bubu ak kwal̦o̦k kõn kobban ilju im jekl̦aj. Joñan, jiroñ in ear kõm̦m̦an elõñ jããn ñan armej ro ear jerbal im kõm̦akoko ñan er. Ke Paul im Sailas rar itok ñan Pilippai, jiroñ in ear l̦oor erro ium̦win elõñ raan, im jetõb ettoon eo ear kõm̦m̦an bwe en lam̦õj im ba: ‘Armej rein rej rũkarejar ro an Anij eo Eutiejtata.’ M̦ae juon raan, Paul ej kab ba ñan jetõb ettoon in: ‘Ilo etan Jesus, kwõn diwõjl̦o̦k jãn jiroñ n̦e!’ Innem jetõb ettoon eo ear diwõjl̦o̦k.

Armej ro me jiroñ in ej kõm̦akoko ñan er rar lukkuun illu ke rar kile bwe ejako kiiõ aer naaj kõm̦m̦an jããn jãn e. Kõn men in, rar bõkl̦o̦k Paul im Sailas ñan ippãn rikien ro im ba: ‘Armej rein ruo rej rupe kien im kainepataik aolep armej ro ilo Pilippai in!’ Innem rikien rein rar jiroñ rijerbal ro bwe ren deñl̦o̦ke erro im likũt erro ilo kalbuuj. L̦eo me ear lale im̦õn kalbuuj eo ear likũt erro ilo ijo emaroktata im elukkuun pen ñan rõl̦o̦k im diwõj jãne, innem ear l̦ake neerro ikõtaan al̦al̦ ko.

Ilo ijin, Paul im Sailas rar al im nõbar Jeova, im rũkalbuuj ro jet rar roñjake aerro al. Ak ilo jidimkij, ear m̦akũtkũt lal̦ ke ej lukwõn boñ, im aolepen jikin kalbuuj eo ear em̦m̦akũtkũt jãn lõñ ñan lal̦. Innem kõjãm ko ilo jikin kalbuuj eo rar pel̦l̦o̦k, im jeen im l̦ak ko an rũkalbuuj ro rar tũm̦. L̦eo ej lale im̦õn kalbuuj eo ear kakõtkõt l̦o̦k ñan ijo elukkuun pen rõl̦o̦k jãne ilo jikin kalbuuj eo, im ear loe an kõjãm ko pel̦l̦o̦k. Ke ej lo aer pel̦l̦o̦k, ear l̦õmn̦ak bwe em̦õj an aolep rũkalbuuj ro ko. Kõn men in, ear bõk juon jãje bwe en itõn m̦an e make.

Ke ej itõn kõm̦m̦ane men in, Paul ear lam̦õjl̦o̦k ñane im ba: ‘Jab m̦an eok make! Kõm aolep im pãd ije!’ L̦ein ear buul̦ l̦o̦k ñan ippãn Paul im Sailas im buñpedo im̦aan mejãerro, im ej kajjitõk ippãerro: ‘Ta eo ij aikuj kõm̦m̦ane bwe in maroñ bõk lo̦mo̦o̦r?’ Erro uwaak im ba ñane: ‘Kwe im ro ilo m̦weo im̦õm̦ rej aikuj tõmak ilo Jesus.’ Innem Paul im Sailas rar katakin er kõn naan ko an Jeova, im l̦ein im aolep ro ilo m̦weo im̦õn rar peptaij.