Во Филипи живеела една слугинка која била обземена од демон. Поради тоа, таа можела да ја претскажува иднината и така им помагала на своите господари да заработат многу пари. Кога Павле и Сила дошле во Филипи, таа ги следела со денови. Демонот ја терал да вика: „Овие луѓе се слуги на Севишниот Бог!“ На крајот, Павле му рекол на демонот: „Во името на Исус, ти заповедам да излезеш од неа!“ Демонот веднаш си заминал.

Кога господарите на девојката сфатиле дека повеќе не можат да заработуваат пари како дотогаш, многу се налутиле. Ги одвеле Павле и Сила кај градските управители и рекле: „Овие луѓе го прекршуваат законот и го вознемируваат целиот град!“ Управителите наредиле Павле и Сила да бидат истепани и фрлени во затвор. Затворскиот чувар ги однел во внатрешниот, најтемниот дел на затворот и им ставил окови.

Павле и Сила му пееле фалбени песни на Јехова, а другите затвореници слушале. Одеднаш, среде ноќта настанал силен земјотрес од кој се затресле дури и темелите на затворот. Вратите на затворот се отвориле, а оковите на затворениците паднале. Затворскиот чувар брзо отишол во внатрешниот дел на затворот и видел дека вратите се отворени. Бидејќи помислил дека сите затвореници избегале, зел меч за да се убие.

Но, тогаш Павле му довикнал: „Немој! Сите сме овде!“ Чуварот брзо дотрчал и клекнал на колена пред Павле и Сила. Тогаш ги прашал: „Што треба да правам за да бидам спасен?“ Тие му одговориле: „Ти и твоите домашни треба да верувате во Исус“. Павле и Сила ги поучиле чуварот и неговите домашни за Јехова, и сите се крстиле.