Itech altepetl Filipos, okatka se ichpochtli tlakeuali tlen okimatiaya tlen panoskia satepan porque okipiaya se amo kuali ejekatl. Nin ichpochtli okitlaniaya miak tomin para itekouan ijkuak okichiuaya non tlamantli. Ijkuak Pablo uan Silas oajsitoj Filipos, nin ichpochtli okintokatinemiaya miak tonalmej. Amo kuali ejekatl okichiualtiaya ichpochtli chikauak ma kijto: “Ninmej tlakamej kitekichiuiliaj Dios tlen Ueyititok”. Saiktlami, Pablo okilui amo kuali ejekatl: “¡Nimitsnauatia ika itoka Jesús xikisa itech ichpochtli!”. Amo kuali ejekatl okichi tlen okinauati Pablo.

Itekouan nin ichpochtli sapanoa okualankej ijkuak okimatkej ayakmo kitlaniskiaj miak tomin. Okinuikakej Pablo uan Silas inmixpan tekiuajkej uan okinmiluijkej: “¡Ninmej tlakamej amo kitlakamatij tlanauatilmej uan kinkuejsojtinemij akinmej nikan chantij!”. Tekiuajkej otlanauatijkej ma kinuitekikan Pablo uan Silas uan ma kintsakuakan. Akin ompa otlamaluiaya okintsak Pablo uan Silas kanin okachi tlaijtik uan kanin okachi otlayoatoka. Noijki, okintseko inmauan uan inmikxiuan itech tablas.

Pablo uan Silas opejkej kiueyichiuaj Jehová ika tlakuikalmej uan akinmej ompa otsaktokaj okinkakiayaj. Tlajkoyoak opejki chikauak tlalolini. Omotlapojkej kaltlatsakuilmej, noijki ouetskej cadenas uan tablas tlen ika oilpitokaj akinmej ompa otsaktokaj. Akin ompa otlamaluiaya totoka okalak uan okitak kaltlatsakuilmej otlapotokaj. Ye omokuayejyeko nochtin ocholojkej, ik non, okikitski se espada tlen ika momiktiskia.

Pablo chikauak okijto: “¡Amo ximomikti! ¡Tinochtin nikan tikatej!”. Akin otlamaluijtoka omotlalo kanin okatkaj Pablo uan Silas uan inmixpan omotlankuaketski. Okintlajtlani: “¿Ken nimomakixtis?”. Yejuan okinankilijkej: “Te uan akinmej chantij mokalijtik moneki xitlaneltokakan itech Jesús”. Pablo uan Silas okimachtijkej iTlajtol Jehová non tlakatl uan akinmej ochantiayaj ikalijtik, satepan yejuan omoapolaktijkej.