MuFilippi omwa li omukadhona omupika e niwe kompwidhuli. Ompwidhuli oya li hayi mu longitha a hunganeke onakuyiwa, nokomukalo nguka okwa likolitha ooyene ye iimaliwa oyindji. Sho Paulus naSilas ye ya kuFilippi, omukadhona ngoka okwa kala he ya landula kehe mpoka taya yi, uule womasiku ogendji. Ompwidhuli oye mu ningitha a kale ti igidha ta ti: “Aalumentu mbaka oyo aamati yaKalunga gwokombandambanda”! Onkee ano, Paulus okwa lombwele ompwidhuli ta ti: ‘Medhina lyaJesus Kristus, za mo muye!’ Ompwidhuli noya zi mo muye.

Ooyene yomukadhona sho ya mono kutya nani ita vulu we oku ya likolitha iimaliwa, oya geye noonkondo. Oya fala Paulus naSilas kaapangeli Aaroma noya ti: ‘Aalumentu mbaka otaya teya ompango notaya piyaganeke oshilando.’ Aapangeli oye ya dhengitha noongola e taye ya tulitha mondholongo. Omulangeli gwondholongo okwe ye edhilile mela lyomeni nokwe ya tula meti.

Paulus naSilas oyi imbile Kalunga omahambelelondjimbo, naanandholongo yalwe oya li ye ya pulakena. Ohaluka, pokati kuusiku evi olya tameke okukakama noonkondo nolya ndjingandjinga ondholongo sigo okomakankameno gayo. Omiyelo dhondholongo odhe eguluka, nomalyenge gaanandholongo oga dhituluka. Omulangeli gwondholongo okwa matukile mondholongo e ta mono omiyelo dhe ekama. Molwaashoka okwa li ta dhiladhila kutya aanandholongo ayehe oya fadhuka po, okwa pweya mo egongamwele lye i idhipage.

Opo nduno Paulus okwi igidha a ti: ‘Ino iningila uuwinayi nando owasha! Atuhe omo tu li.’ Omulangeli okwa matukile mo nokwi ihata poompadhi dhaPaulus naSilas. Okwe ya pula a ti: “Ondi na okuninga shike, opo ndi hupithwe?” Oye mu lombwele ya ti: ‘Ngoye naanegumbo lyoye omu na okwiitaala muJesus.’ Opo ihe Paulus naSilas oye ya longo oohapu dhaJehova, nomulangeli gwondholongo okwa ninginithwa pamwe naanegumbo lye.