Ɛnee kakula bɛlɛra bie mɔɔ le akɛlɛ na sunsum ɛtane wɔ ɔ nwo la wɔ Felepae. Sunsum ɛtane ne maanle ɔhanle kenle bie edwɛkɛ, na ɛhye maanle kakula bɛlɛra ne amenle mɔ nyianle bɛ nwo. Mɔɔ Pɔɔlo nee Saelase rale Felepae la, ɔlile bɛ nzi fane dɔɔnwo. Sunsum ne maanle ɔdeɛdeanle nu kɛ: “Menli ɛhye le Anwuma Anwumanli Nyamenle ne ngɛkɛlɛ.” Akee Pɔɔlo zele sunsum ne kɛ: ‘Gyisɛse duma nu ti ɛvi ɔ nwo tu.’ Sunsum ne vi ɔ nwo dule.

Mɔɔ kakula bɛlɛra ne amenle mɔ nwunle kɛ bɛnrɛnyia ɔ nwo zo nvasoɛ bieko la, bɛvale ɛya. Bɛhwenle Pɔɔlo nee Saelase bɛhɔmaanle mgbanyima ne mɔ na bɛhanle kɛ: ‘Menli ɛhye mɔ ɛnli mɛla ne azo yɛɛ bɛlɛgyegye yɛ sua ye kpole kpalɛ!’ Mgbanyima ne mɔ hanle kɛ bɛbo bɛ na bɛgua bɛ efiade. Efiade neavolɛ ne guale bɛ wɔ efiade ne ɛleka mɔɔ le awozinli kpalɛ la na ɔkyekyele bɛ gyakɛ nee bɛ sa ɔbɔle baka nu.

Mɔɔ Pɔɔlo nee Saelase ɛlɛto edwɛne aye Gyihova ayɛlɛ la, ɛnee pilizama mɔɔ ɛha la ɛlɛtie. Arɛlevilɛ nu wɔ nɔe ne, azɛlɛ kpusule kpole bie. Efiade nlenkɛ ne mɔ bukebukele, yɛɛ kyeenyi mɔɔ gua pilizama ne asa la kpolole guale. Neavolɛ ne nriandile hɔle efiade ɛkɛ ne na ɔnwunle kɛ nlenkɛ ne mɔ gua nwo. Kɛmɔ ɔsuzu kɛ pilizama ne ɛnriandi la ati, ɔhwenle dadeɛ kɛ ɔku ɔ nwo.

Ɛkɛ ne ala Pɔɔlo deanle nu kɛ: “Mmaku ɛ nwo, yɛ muala yɛwɔ ɛke!” Efiade neavolɛ ne nriandile hɔhotole Pɔɔlo nee Saelase anyunlu ɛkɛ. Ɔbizale bɛ kɛ: “Duzu a ɔwɔ kɛ meyɛ na meanyia ngoane a?” Bɛzele ye kɛ: ‘Ɔwɔ kɛ ɛ nee wɔ sua nu amra die Gyisɛse di.’ Akee Pɔɔlo nee Saelase hilehilele bɛ Gyihova edwɛkɛ ne, na bɛzɔnenle neavolɛ ne nee ye sua nu amra amuala.