Nan Pilipai, mie lidu serepein men me ngehn suwed men mi loale. Ngehn suwedo kin doadoahngki serepeino en kin kasawihada dahme pahn wiawi, oh e kin wiahda mwohni tohto ong eh kaun ko. Ni ahnsou me Pohl oh Sailas kohdo Pilipai, serepeino kin pwakipwakih ira erein rahn tohto. Ngehn suwedo kin kahrehiong en wer, ndinda: “Ohl pwukat ladun Koht, Wasa Lapalahpie!” Pohl eri ndaiong ngehn suwedo: ‘Ni mwaren Sises, pedoisang serepeinen!’ Ngehn suwedo ahpw pedoisang rehn serepeino.

Ni ahnsou me en serepeino kaun ako tehkada me irail solahr pahn wiahda mwohni sang rehn serepeino, irail uhdahn lingeringerda. Irail wurahdekihla Pohl oh Sailas mwohn me lapalap akan oh nda: ‘Ohl pwukat kaukauwehla kosonnedo oh kalingeringerihada aramas en kahnimw wet!’ Lapalap ako eri nda me Pohl oh Sailas en wowoki oh lekdekiong nan imweteng. Sounsilasilo eri keseirahlong nan wasa me keieu rotorot nan imwetengo oh salihedi nehra oh pehra ko ni tuhke toutou kei.

Aramas teiko me iang selidi nan imwetengo rongorong Pohl oh Sailas ara koulki koulen kaping ong Siohwa. Ni ahnsowohte, ni lukepen pwongo, rerrer en sahpw kehlail ehu pa wiawi oh itikada poahsoan en ihmwo lel pohn ihmwo. Wenihmwen imweteng ko koaros ahpw ritida, oh selmete ko oh tuhke ko me mi ni pehn oh nehn irail me sensel ko ahpw pwupwusang. Sounsilasilo ahpw mwadangete tangolongala pwehn kilang imweteng me mi loale ko oh e kilangada me wenihmw ko ritpesengier. E ahpw medewehiong me koaros me sensel ko tangpesengier, ih eri ale nah kedlahso pwehn kemehla pein ih.

Ni ahnsowohte Pohl likwerlahng sounsilasilo: ‘Dehr kamedekeiukala! Kiht koaros mihmihte wasaht!’ Sounsilasilo ahpw tangolongala oh kelehpwikihdi mwohn Pohl oh Sailas. Ih eri peki rehra, nda: “Dahme I pahn wia pwe I en kak mourla?” Ira eri ndaiong: ‘Kowe oh tohn imwomwo anahne pwoson Sises.’ Pohl oh Sailas eri padahkihong irail duwen mahsen en Siohwa, oh sounsilasilo oh tohn imweo pwon papidaisla.