Filipos llajtapi uj sipas supayniyoj kaspa adivinasqanrayku ashkha qolqeta patronesninta ganachej. Pablowan Silaswan chay llajtaman chayajtinkutaj, chay sipasqa paykunata ashkha diasta qhatiykacharqa. Supaytaj chay sipasta qhaparichej: “Kay runasqa Aswan Patapi kaj Diospa kamachisnin kanku”, nispa. Pablotajrí chay supayta nerqa: “Jesucristoj sutinpi kamachiyki paymanta llojsinaykita”, nispa. Supaytaj chay sipasmanta llojserqa.

Chay sipaspa patronesnenqa niña qolqeta gananankuta yachaspa phiñakorqanku. Pablotawan Silastawantaj kamachejkunaman qhatataspa nerqanku: “Kay runasqa mana leyta kasukunkuchu, runastataj chʼajwachishanku”, nispa. Chay kamachejkunaqa Pablotawan Silastawan seqʼospa carcelman wisqʼaykucherqa. Carcelerotaj paykunata aswan ukhuman wisqʼaykorqa, chakisninkutataj maderamanta uj cepoman japʼiykucherqa.

Chaupi tutata jinataj Pablowan Silaswan takispa Diosta alabasharqanku, waj presostaj uyarisharqanku. Ujllatataj sinchʼi terremoto karqa. Carcelpa punkusnintaj kicharikorqa, tukuynin presospa cadenasninkutaj phaskarakorqa, cepopi kajkunajtapis. Carcelerotaj usqhayllata carcelpa aswan ukhunman yaykuspa punkusta kichasqasta rikorqa. Yuyarqataj presos ayqesqankuta, espadanta orqhospataj wañuchikuyta munarqa.

Pablotaj chay rato nerqa: “¡Ama wañuchikuychu! Tukuyniyku kaypi kakushayku”, nispa. Carcelerotaj correspa Pabloman, Silasmanwan qonqoriykukuspa taporqa: “¿Imatá ruwanay tiyan salvakunaypajri?”, nispa. Paykunataj nerqanku: “Qanpis, wasiykipi kajkunapis, Jesuspi creeychej”, nispa. Chantá carceleroman, wasinpi kajkunamanwan Diosmanta yachacherqanku, paykunataj bautizakorqanku.