Pa Filipos, kʼo jun ajpataninel ali che kkun che uchʼobʼik ri petinaq rumal che kʼo jun itzel uxlabʼal pa ri ucuerpo. Rukʼ wajun chak riʼ ri rajaw ri ali kuchʼak kʼi pwaq. Are chiʼ Pablo xuqujeʼ Silas xeʼopan pa Filipos, ri ali xumaj kiternexik jachiʼ kebʼe wi kʼi qʼij xubʼan wariʼ. Ri itzel uxlabʼal kubʼano che kuraq uchiʼ ri ali: «We achijabʼ riʼ e rajpatanel ri Dios ajchikaj». Kʼisbʼal re, Pablo xubʼij che ri itzel uxlabʼal: «¡Kinya taqanik chawe pa ri ubʼiʼ ri Jesús che katel bʼi pa ri ubʼaqil ri ali!». Ri itzel uxlabʼal xel bʼi pa ri ubʼaqil ri ali.

Are chiʼ ri e rajaw ri ali xkilo che kʼo ta chi más pwaq kkichʼak chrij, sibʼalaj xpe koyowal. Xkijururej bʼi ri Pablo xuqujeʼ ri Silas xekikʼam bʼi chkiwach ri ajawinelabʼ, xuqujeʼ xkibʼij chke: «¡Ri e achijabʼ riʼ kkinimaj ta ri taqanik, xuqujeʼ tajin kekitukij ri winaq re ronojel ri tinamit!». Ri e ajawinelabʼ xkiya taqanik che kechʼay ri Pablo xuqujeʼ ri Silas xuqujeʼ che kekoj pa cheʼ. Ri chajinel xeʼuya pa jun kʼolbʼal che más chupam ri ja kʼo wi, che sibʼalaj qʼequʼm. Xuqujeʼ, xeʼukoj pa ri cepo, o ri kraj kubʼij, xkoj ri kaqan pa ri e jul re jun tzʼalam.

Tekʼuriʼ, Pablo xuqujeʼ Silas xkimaj bʼixonem rech kkiqʼijilaj ri Jehová, ri nikʼaj chik che e tzʼapitalik tajin kkitatabʼej. Xaq kʼateʼ, pa unikʼajil ri chaqʼabʼ, jun nimalaj kabʼraqan sibʼalaj xusilabʼaj ri kʼolbʼal e kʼo wi. Xujaq ronojel ri uchiʼja xuqujeʼ xetzoqopitaj ri cadenas xuqujeʼ ri cepo che kojom chke ri achijabʼ. Ri ajchajinel panim xok bʼi chupam xuqujeʼ xrilo che ri e uchiʼja e jaqatal chik. Xuchomaj che ri e winaq xeʼel bʼik, rumal laʼ xukʼam jun espada rech kukamisaj ribʼ.

Qas pa ri tiempo riʼ, Pablo xuraq uchiʼ: «¡Kabʼan ta kʼax chbʼil awibʼ! ¡Qonojel oj kʼo waral!». Ri ajchajinel panim xbʼe jachiʼ e kʼo wi ri Pablo xuqujeʼ Silas xxukiʼ chkiwach. Xutaʼ chke: «¿Jas rajawaxik kinbʼano rech kinkolotajik?». E areʼ xkibʼij che: «At xuqujeʼ ri e kʼo pa ri awachoch rajawaxik kixkojon chrij ri Jesús». Tekʼuriʼ, Pablo xuqujeʼ Silas xkimaj ukʼutik ri utzij ri Jehová, ri ajchajinel xuqujeʼ ronojel ri e kʼo pa rachoch xkibʼan kiqasanjaʼ.