Filipos llaqtapim demoniopa munaychakusqan sipas runakunapa vidankumanta yachaq, chaymi patronninkunaqa chaywan achka qullqita chaskikuqku. Pablotawan Silastam chay sipasqa mayman riptinkupas ukunpi kaq demonio qayaykachachiptin kaynata nispan qatiq: “Kay runakunaqa hanaq pachapi Diospa runankunam”, nispa. Chaymi Pablo chay sipaspa ukunpi kaq demoniota nirqa: “¡Jesuspa sutinpim kamachiki kay sipasmanta lluqsinaykipaq!”, nispa. Hinaptinmi demonioqa chaylla lluqsirurqa.

Chay sipaspa patronninkunam manaña qullqita chaskispanku llumpayta piñakururqaku, chaymi Pablotawan Silasta llaqtata kamachiqkunaman pusaruspanku nirqaku: “¡Kay runakunam llaqtapa kamachisqanta mana kasukuspanku llaqtanchikpi chaqwata ruwachkanku!”, nispa. Llaqtata kamachiqkunañataqmi maqaparachispanku carcelpa uku law tutayayman hinarachirqaku, hinaspam tablamanta ruwasqa kaqwan chakinkunatapas hapirachirqaku.

Chaymi Pablowan Silasqa presomasinkuna uyarinankupaq hina Jehova Diospaq takirqaku. Hinaptinmi chawpi tutata allpa pacha kuyuptin carcelpa punkunkunapas kichakururqa, presokunapa cadenankupas hinaspa chakinkuta tablawan hapichisqankupas kachakuykurqam, chaymi carcelta qawaqpas presokuna lluptirusqankuta piensaspan espadanwan tuksikuruyta munarqa.

Chayllam Pablo kallpawan nirqa: “¡Ama imanakuychu, kaypim llapayku kachkaniku!”, nispa. Chaymi carcelta qawaqqa Pabloman hinaspa Silasman qunqurakuykuspan nirqa: “¿Imatataq ruwayman hinalla kawsakunaypaq?”, nispa. Paykunañataqmi nirqaku: “Qampas hinaspa wasikipi kaqkunapas Jesuspa qatiqninmi kanaykichik”, nispa. Chaymi Pablowan Silasqa Jehova Diosmanta yachachiptinku chay runaqa aylluntin bautizakururqaku.