Ко Филипи живинела сине јекх слугинка хем ки лате андре сине демони. Адалеске ој шај сине те вакерел и иднина хем аѓаар поможинела сине пле господаренге те овел лен бут паре. Кеда о Павле хем о Сила але ко Филипи, ој бут диве џала сине пали ленде. О демони теринела ла сине те викинел: „Акала мануша служинена е Најбаре Девлеске!“ Ко крајо, о Павле вакерѓа е демонеске: „Ко анав е Исусескоро, заповединава туке икљов латар!“ О демони одма иклило тари чхај.

Кеда о господарија е чхајакере халиле кај ој нашти више те анел ленге паре сар поангле, бут хољанѓе. Ингарѓе е Павле хем е Сила ко е дизјакере управителија хем вакерѓе: „Акала мануша пхагена о закони хем вознемиринена цели диз!“. О управителија нарединѓе е Павле хем е Сила те марен лен хем те чхивен лен ко затвор. О затворско чувари ингарѓа лен ко андруно, најтемно дело ко затвор хем чхивѓа ленге оковија.

О Павле хем о Сила гиљавена сине гиља те фалинен е Јехова, а о јавера затвореникија шунена лен сине. Таро јекх пути, ки екваш и рат сине баро земјотрес хем тресинѓе чак о темелија таро затвор. Пхравдиле о удара е затворескере, а о оковија е затворениконгере пеле. О затворско чувари сигате гело ко андруно дело таро затвор хем дикхља кај о удара сине пхравде. Ов мислинѓа кај са о затвореникија нашле хем адалеске леља о мачи те мударел пе.

Ама, тегани о Павле вакерѓа леске: „Ма! Сарине сием акате!“ О чувари прастандило хем пело ко кочака англо Павле хем о Сила. Тегани пучља лен: „Со ваљани те керав те шај те овав спасимо?“ Ола одговоринѓе леске: „Ту хем тли фамилија ваљани те верујнен ко Исус“. О Павле хем о Сила сикавѓе е чуваре хем лескере фамилија башо Јехова, хем сарине крстинѓе пе.