Ko Filipi živindža jekh sluškinja hem ano late hine demoni. Odoljese oj šajindža te vačeri i budućnost hem adžahar andža but pare pe gospodarendže. Ked o Pavle hem o Sila alje ko Filipi, oj but dive dželji palo ljende. O demoni terindža la te vičini: „Akala manuša služinena e Najbare Devljese!“ Ko krajo, o Pavle phendža e demonese: „Ko e Isuseso nav, zapovedinava tuče, ikljov olatar!“ O demoni odmah ikljilo andi čhaj.

Ked e čhajake gospodarija haljilje so oj našti više te anel ljendže pare sar angljeder, hine but holjame. Igardže e Pavle hem e Sila ko e dizjake upraviteljija hem phendže: „Akala manuša na ičerena pe ko zakon hem uznemirinena celo diz!“ O upravitelija naredindže o Pavle hem o Sila te oven marde hem te čhiven ljen ko phanljipe. O zatvorsko čuvari igardža ljen ko najtamno deo ko phanljipe hem čhivdža ljendže okovija.

O Pavle hem o Sila džilabdže džilja te hvalinen e Jehova, a avera zatvorenikija šundže ljen. Ando jekh puti, ki ekvaš i rat hine baro zemljotres hem tresindža pe celo phanljipe. Sa o udara phravdilje, a o okovija ando zatvorenikija pelje. O zatvorsko čuvari prastandilo hem dikhlja so o udara hine phravde. Ov mislindža so sa o zatvorenikija našlje hem odoljese ljelja o mač te mudari pe.

Ama, tegani o Pavle phendža ljese: „Ma čer odova! Sarine hijam akate!“ O čuvari prastandilo andre hem pelo ko kočija anglo Pavle hem o Sila. Tegani pučlja ljen: „So valjani te čerav te šaj te ovav spasimo?“ On odgovorindže ljese: „Tu hem ti porodica valjani te verujinen ko Isus.“ O Pavle hem o Sila sikavdže e čuvare hem oljese porodica ando Jehova, hem sarine krstindže pe.