Андэ Филиппы жувэлас ек манушни, сави терэлас бути кай и мануша. Андэ кадэя манушни сас бэнг. О бэнг терэлас кадя, кай кадэя манушни тэ ԥэнэн, со авэла англэ. И мануша потинэнас важ када ловэ. И кодэла, кастэ вой терэлас, драго па када затерэнас. Кала андэ Филиппы авелэ о Павло и о Сила, кадэя манушни ля пала лэндэ тэ ԥирэл. О бэнг терэлас кадя, кай вой тэ цыпий: «Кадэла мануша, раборя лэ Всевышнёнэ Дэвлэсти!» Кадя вой терэлас най ек дес. И акэ, о Павло ԥэндя лэ бэнгэсти, саво сас андэ манушни: «Лэ Иисусостирэ алавэстар вижа андар латэ!» Тоди о бэнг вижыля анда манушни.

Кала и мануша, кастэ терэлас кадэя манушни, полинэ, кай пар латэ будэр на затерэса, вонэ фартэ росхоляйлэ. Вонэ астардэ лэ Павлос и лэ Силас и одындярдэ лэн кай и мануша, савэ сас барэ андо форо и ԥэндэ: «Кадэла мануша ԥагэн о законо и стердэ, кай андо форо нинай порядко!» Тоди и барэ мануша приԥэндэ, кай лэн тэ марэн и тэ шон андо баруно. О мануш, саво диқэл пала барунаря, одындярдя лэн андэ само дурутно и тэмно ҭан андо баруно и стодя пэр лэндэ колодки.

О Павло и о Сила линэ тэ хвалин андэ диля лэ Иеговас, ай и барунаря ашунэнас. И акэ, андэ машкар рят фартэ затиносайля и ԥув. Кадэлэстар и двэри андо баруно ԥэрнаделэ и па всаворэ барунаря спэлинэ и цэпоря и колодки. О мануш, саво диқэлас пала барунаря, поднашля и додиқля, кай и двэри ԥэрнадэ. Во гиндосардя, кай всаворэ барунаря унашлэтар. Тоди во виля о мечо, кай пэс тэ умарэл.

О Павло зацыписайля: «На умар пэс! Амэ всаворэ катэ!» О мануш, саво диқэлас пала барунаря, поднашля каринг и барунаря и пэля пэ чанга англа Павло и Сила. Во пушля: «Со манди трэбуй тэ терав, кай тэ спасысавав?» Вонэ ԥэндэ: «Ту и всаворэ, ко жувэн андэ тиро цэр, трэбуй тэ патян андо Иисусо». Тоди о Павло и о Сила росԥэндэ лэсти и кодэлэнди, ко жувэн андэ лэско цэр пала Иегова. После када вонэ болделэ.