Filiphisiyusi katamira bushu ayyaani einose borojjicho no. Bushu ayyaani tini beetto kiiltanno gede assino; ise kiilte soqqantanno mannira lowo woxe abbitannonsa. Phaawuloosinna Silaasi Filiphisiyusi katama martuta, hatti beetto duucha barra insa hoode hadhu. Bushu ayyaani ise togo yite cancitanno gede assi: “Kuni manni Woˈmunkura Aliidi Magani soqqamaanooti.” Gedensaanni Phaawuloosi hakkonne busha ayyaana, ‘Yesuusi suˈminni tenne beetto giddonni fuli!’ yii. Hakkiinni bushu ayyaani beettote giddonni fuli.

Hatti beetto soqqantannonsa manni, xaate ise kiilte woxe abbite affannokkita afiti lowo geeshsha hanqi. Insa Phaawuloosinna Silaasi katamu gashshaanowa massite togo yitu: ‘Kuni manni seera diiganninna katamu giddo qarra kalaqanni no!’ Katamu gashshaano Phaawuloosinna Silaasi ganne kaˈne usuru minira eessinanni gede hajajju. Usuru mini agaraanchi insa giddiidi kifile masse tunsote lekkansa biqe haqqaho qole usuri.

Usurame noohu wolu manni Phaawuloosinna Silaasi Yihowara faarsitanna macciishshi. Hashshu taalootira hedeweelcho baatto huxidheenna usuru mini gudisame shafami. Hakkiinni cufanna baala faˈnantu; manna usurroonniti siwiilu siiwono tattaˈu. Agaraanchu rahe giddiidi kifile maranno woyite usuru mini faˈname no. Usuranyu baalu fule bainoha laweennasi isonooto shaara bise fushshiˈri.

Hakkiinni Phaawuloosi agaraanchoho, ‘Ninke baalunku kowiicho heeˈnoommona umokki galaaffattooti!’ yii. Agaraanchu dodanni mare Phaawuloosinna Silaasi albaanni diriire uwi. Isi “Gateemmo gede maa asso?” yee xaˈmi. Insa, “Atino minikki mannino gattinannina, Mooticha Yesuusa ammanne” yitusi. Hakkiinni Phaawuloosinna Silaasi Yihowa qaale rosiissunsa; usuru mini agaraanchinna minisi mannino baalu cuuami.