EFiliphu bekunalenye intfombatana lesigcili lebeyinemadimoni. Lamadimoni bekenta lentfombatana ikhone kuphengula futsi banikati bayo bebatfola imali lenyenti. Ngesikhatsi boPawula naSilasi bafika eFiliphu, yabalandzela emalanga lamanyenti. Emadimoni ayenta kutsi imemete itsi: “Lamadvodza atinceku taNkulunkulu Losetikwako Konkhe.” Pawula watsi kulamadimoni: ‘Egameni laJesu Khristu ngitsi phuma kuye.’ Lamadimoni aphuma kuyo.

Nababona kutsi litsemba labo lekutfola imali alisekho, labanikati balentfombatana bakwata kakhulu. Babamba Pawula naSilasi babahudvulela embikwebabusi, bafike batsi: ‘Lamadvodza ahlupha kakhulu lapha edolobheni lakitsi.’ Lababusi batsi boPawula naSilasi abashaywe bese bavalelwa ejele. Gadzi wasejele wabafaka esitokisini, wakhungela tinyawo tabo etigodvweni.

BoPawula naSilasi badvumisa Nkulunkulu ngetingoma, futsi letinye tiboshwa tatilalele. Ekhatsi nebusuku, kwatamatama umhlaba, yonkhe iminyango yasejele yavuleka, netinketane letatibabophile takhumuka kubo bonkhe. Nakavuka futsi abona kutsi iminyango yelijele ivulekile, logadzi wakhipha inkemba yakhe afuna kutibulala, ngobe abecabanga kutsi letiboshwa tibalekile.

Kusenjalo Pawula wamemeta watsi: ‘Ungatilimati, sikhona sonkhe!’ Logadzi wagijima wafike waguca embikwabo Pawula naSilasi. Wababuta watsi: ‘Yini lokufanele ngiyente kuze ngisindziswe?’ Bamphendvula batsi: ‘Kholwa yiNkhosi Jesu, futsi wena nemndeni wakho nitawusindziswa.’ Base bamfundzisa ngaJehova, futsi logadzi nawo wonkhe umndeni wakhe babhajatiswa.