Motseng oa Filipi ho ne ho e-na le ngoanana oa lekhoba ea neng a khathatsoa ke ledemona. Ledemona leo le ne le etsa hore ngoanana eo a khone ho bolela lintho pele li etsahala ’me a etsetsa beng ba hae chelete e ngata. Ha Pauluse le Silase ba le Filipi, ngoanana enoa o ne a lula a ba setse morao hohle moo ba eang. Ledemona leo le ile la re ngoanana eo a hoeletse a re: “Banna bana ke makhoba a Molimo ea Phahameng ka ho Fetisisa.” Qetellong Pauluse a re ho ledemona leo: ‘Ka lebitso la Jesu, tsoa ho eena!’ Eaba ledemona leo lea tsoa ho eena.

Ha beng ba ngoanana eo ba hlokomela hore ha ba sa tla khona ho etsa chelete, ba ile ba halefa. Eaba ba hulela Pauluse le Silase ho bo-maseterata ba re: ‘Banna bana ba tlola molao ’me ba ferekanya motse oa rona!’ Bo-maseterata ba ile ba laela hore Pauluse le Silase ba otloe ’me ba isoe teronkong. Molebeli oa teronko o ile a ba kenya teronkong e lefifi ka ho fetisisa eaba o ba fasa ka lihanaboi.

Batšoaruoa ba ne ba mametse Pauluse le Silase ha ba binela Jehova lithoriso. Eaba ka tšohanyetso ha e-ba le tšisinyeho e kholo ea lefatše har’a bosiu. Mamati a teronko a buleha eaba le lihanaboi tsa batšoaruoa lia fasoloha. Molebeli oa teronko o ile a mathela ka teronkong e lefifi, a fumana mamati a bulehile. Kaha o ne a nahana hore batšoaruoa ba balehile, a leka ho ipolaea ka sabole.

Ka nako eo, Pauluse a hoeletsa a re: ‘U se ke oa intša kotsi! Re ntse re le teng kaofela!’ Molebeli a mathela ho Pauluse le Silase eaba o re: “Ke etse’ng hore ke pholohe?” Ba re ho eena: ‘Uena le ba lelapa la hao le lokela ho lumela ho Jesu.’ Eaba Pauluse le Silase ba mo ruta lentsoe la Molimo ’me molebeli le bohle ba ntlo ea hae hae ba kolobetsoa.