Nisy ajaja ampela ndevo nisy Demonia ta Filipy agne. Nanjare nanan-drala maro i tompo’ey, satria nahay nagnambara ty hoavy i ajaja ampelay. Naho fa niavy tao ty Paoly naho i Silasy, le norikorihe i ajajay avao. Nampikorakorahe i demoniay reke tie: “Mpanompo i Andrianagnahare Tompo ty Herỳ o lahilahy rehoe!” Fara’e, rineha i Paoly i demoniay tie: ‘Amy ty agnara i Jesosy, mialà ama’e rehe!’ Le niala i demoniay.

Niboseke ty tompo i ajajay, satria tsy hahazo drala boake ama’e sasa. Tinaritary iareo ho amy ty mpitsara an-tanàgne ao ty Paoly naho i Silasy, le hoe iareo: ‘Mitrobo tane sady mandika lalàna ty lahilahy retoagne!’ Nandily ty hijeragne i Paoly naho i Silasy i mpitsaray, le hogadraegne iareo afara izay. Nasiagne boda-katae ka ty tombo iareo naho ty tagna’e iareo, vaho izay iareo natao tam-pigadragne ao.

Nidera i Jehovah amy ty hira ty Paoly naho i Silasy, le naharey izay ty gadra niharo amy iareo. Naho fa nisasa-kalegne, le nisy ezegnezen-tane i toeragne figadragney. Nisokake i lalagney sady nivaha iaby ty seny naho ty boda-katae tamy i gadra rey. Nilay mbeo i mpiambegney, le nahatrea i lalagney nivoha. Ho namono tegna reke, fa atao’e ho nilay iaby i gadra rey.

Tinoka i Paoly reke tie: ‘Ko mamono tegna rehe fa ato iaby zahay!’ Nizilike ao i mpiambegney, le niankohoke taloha i Paoly naho i Silasy eo. Nangatake reke tie: “Ino ty raha tsy maintsy ataoko mba hahavotse ahy?” Hoe iareo tama’e: ‘Minoa i Jesosy nareo keleian-draike.’ Nampianare i Paoly naho i Silasy ty saontsy i Jehovah iareo, le natao badisa i mpiambegney naho ty keleia’e.