Ku Filipi, kwakali musimbi muzike iwakanjidwe daimona. Daimona lyakali kumupa kusonda, alimwi wakabapangila mali manji basimalelaakwe kwiinda mukusonda. Ciindi Paulo a Sila nobakasika ku Filipi, musimbi wakali kubatobela kwamazuba manji. Daimona lyakamupa koompolola kati: “Baalumi aaba mbazike ba Leza Mupatikampatila.” Kumamanino, Paulo wakaambila daimona kuti: ‘Muzina lya Jesu kozwa mulinguwe!’ Daimona lyakazwa mumusimbi.

Ciindi basimalelaakwe nobakazyiba kuti musimbi tanaakacili kukonzya kubapangila mali, bakanyema kapati. Bakakwela Paulo a Sila akubatola kubeendelezi batwaambo twabuleya kabati: ‘Baalumi aaba batyola mulawo akunyonganya munzi woonse!’ Beendelezi bakalailila kuti Paulo a Sila baumwe akuwaalilwa muntolongo. Mulindizi wantolongo wakabawaalila muntolongo yamukati akwaanga maulu aabo muziliba.

Paulo a Sila bakaimba nyimbo kutembaula Jehova kumwi baangenyina bamwi kabaswiilila. Cakutayeeyelwa, akati kamasiku, muzuzumo wanyika mupati wakazungaanya ntolongo kuzwa atala kusikila ansi. Milyango yantolongo yakajaluka, mpoonya nketani zyabaange alimwi aziliba zyakaangunuka. Mulindizi wantolongo wakazuzila muntolongo yamukati mpoonya wakabona kuti milyango yakalijalukide. Kayeeya kuti baange boonse batija, wakabweza panga kutegwa alijaye.

Mpoonya-mpoonya Paulo wakoongolola kati: ‘Utalijayi pe, nkaambo toonse nkotuli!’ Mulindizi wantolongo wakazuzila mukati akuwida kumaulu aa Paulo a Sila. Wakababuzya kuti: “Ino ncinzi ncondeelede kucita kutegwa ndifwutulwe?” Bakamwaambila kuti: ‘Yebo abamuŋanda yako mweelede kusyoma muli Jesu.’ Mpoonya Paulo a Sila bakabayiisya majwi a Jehova, kumane mulindizi wantolongo alimwi abamuŋanda yakwe boonse bakabbapatizyigwa.