Long Filipai, wanpela wokmeri i gat dimon i stap long em. Dispela dimon i yusim meri long tokaut long ol samting i stap hait, na long dispela rot em i kisim planti mani bilong ol bosman bilong em. Taim Pol na Sailas i kam long Filipai, meri i bihainim ol inap planti de. Dimon i mekim na em i singaut: “Ol dispela man i wokboi bilong God Antap Tru.” Nau, Pol i tokim dispela dimon: ‘Long nem bilong Jisas, lusim dispela meri na kam ausait!’ Na dimon i lusim meri.

Taim ol bosman bilong dispela meri i luksave olsem rot bilong ol long kisim mani i pinis, ol i belhat tru. Ol i pulim Pol na Barnabas i go long ol majistret na tok: ‘Dispela tupela man i brukim lo na mekim ol manmeri bilong taun i bel hevi!’ Ol majistret i tokim ol man long paitim Pol na Sailas na putim tupela long kalabus. Woda i putim tupela long rum i stap insait tru, em rum i tudak tru na pasim lek bilong tupela long hap plang.

Ol narapela kalabusman i harim Pol na Sailas i singsing bilong litimapim nem bilong Jehova. Long biknait, wantu wanpela bikpela guria i seksekim haus kalabus olgeta. Ol dua bilong haus kalabus i op, na sen na hap plang bilong ol kalabusman i lus. Woda i ran i go long rum i stap insait tru na lukim ol dua i op i stap. Em i save ol kalabusman i ranawe pinis, na em i kisim bainat bilong kilim i dai em yet.

Long dispela taim stret, Pol i singaut: ‘No ken bagarapim yu yet! Mipela olgeta i stap!’ Woda i ran i go na pundaun klostu long lek bilong Pol na Sailas. Em i askim ol: “Mi mas mekim wanem na bai God i kisim bek mi?” Ol i tokim em: ‘Yu na ol wanhaus bilong yu i mas bilip long Jisas.’ Bihain Pol na Sailas i skulim dispela woda na olgeta wanhaus bilong em long tok bilong Jehova, na ol i kisim baptais.