Haroho omwana omwisiki omuzaana omu rubuga rwa Firipi akaba akwasirwe omwoyo omubi. Omwoyo gunu omubi gw’akozesaga omwana onu omwisiki nk’omuraguzi, kandi ekintu kinu kyaleteraga abakama be kutunga sente nyingi. Omukwenda Paulo na Sira obu baizire omu Firipi, omwana onu omwisiki akaikara nabahondera kumara ebiro bingi. Omwoyo omubi gwamuleteraga kutokera haiguru n’agamba: “Abantu banu bairu rubale ba Ruhanga Anyakuli Haiguru Muno.” Obwire bukahika omukwenda Paulo yagambira omwoyo gunu omubi ngu: ‘Ninkuragira omu ibara lya Yesu, ruga omu mwana onu!’ Omwoyo gukamurugamu gwagenda.

Bakama b’omwisiki onu obu barozere ngu omulingo gwabo ogw’okutunga sente gukaba guhoireho, bakakwatwa ekiniga kingi. Bakakurra omukwenda Paulo na Sira babatwara omu maiso g’abacwi b’emisango nibagamba ngu: ‘Abasaija banu nibacwa ebiragiro kandi nibaleta akaimukirro omu rubuga rwona!’ Abacwi b’emisango bakaragira ngu omukwenda Paulo na Sira babatere embooko kandi bababohe omu nkomo. Omulinzi akabatwara yabata omu nkomo omu nda muno, nambere hakaba hali omwirima, kandi ebigere byabo babibohera omu bibbaho.

Omukwenda Paulo na Sira bakatandika kuzina ebizina ebirukuhaisaniza Yahwe kandi abanyankomo bandi bakaba nibabahurra. Omwitumbi, omusisa gw’amaani gukatera gwatengesa enkomo yoona. Enyigi z’enkomo zikakinguka, kandi enjegere n’ebibbaho ebikaba bibohere abanyankomo bikasumurruka. Omulinzi akarahuka yagenda omunda omu nkomo kandi yasanga enyigi zikingukire. Obuyatekeriize ngu abanyankomo boona batorokere, akaihayo empirima yagonza kweyita.

Paulo obuyamurozere, akatokera haiguru yagamba ati: ‘Otekora kubi! Itwena turoho!’ Omulinzi akanguha yataaha omunda yateeza amaju omu maiso ga Paulo na Sira. Akabakaguza ati: “Kimpikiriire kukora [ki] okujunwa?” Bakamugarukamu bati: ‘Iwe n’ab’omu nju yawe musemeriire kwikiririza omu Yesu.’ Nubwo Paulo na Sira babegesa ekigambo kya Yahwe, kandi omulinzi onu n’ab’omu nju ye boona babatizibwa.