I Philipi, i vai na te hoê tavini tamahine tei uruhia e te hoê demoni. Ua faaohipa te demoni i tera tamahine ei taata hiˈohiˈo. Maoti oia i fanaˈo ai ta ˈna mau fatu i e rave rahi moni. A tae ai o Paulo raua Sila i Philipi, ua apee tera tamahine ia raua e rave rahi mahana. Ua turai te demoni ia ˈna ia tuô: “E tavini teie na tane a te Atua Teitei.” I te pae hopea, ua parau o Paulo i te demoni: ‘I te iˈoa o Iesu, ia haere mai oe i rapae ia ˈna!’ Ua faarue ihora te demoni i taua tamahine ra.

A taa ˈi te mau fatu o tera tamahine e eita ratou e moni-faahou-hia maoti o ˈna, ua riri roa ratou. Ua haru atura ratou ia Paulo raua Sila no te afai atu i mua i te mau tavana tivira, a na ô ai: ‘Aita tera mau taata e pee ra i te ture e te faahuehue ra raua i te oire taatoa!’ Ua faaue atura te mau tavana tivira ia tairi ia Paulo raua Sila e ia huri ia raua i roto i te fare tapearaa. Ua tuu te taata tiai ia raua i roto i te tuhaa hohonu e poiri roa ˈˈe o te fare tapearaa e ua haamau atura oia i to raua na avae i roto i te raau.

Ua himene atura o Paulo raua Sila no te arue ia Iehova e ua faaroo te tahi atu feia tapeahia ia raua. I te tuiraa po, tupu taue atura te hoê aueueraa fenua puai mau e hautiuti atura te fare tapearaa taatoa. Ua matara ihora te mau uputa o te fare tapearaa. Oia atoa te mau fifi auri e te mau raau i tapea na i te mau taata. Ua horo atura te taata tiai i roto i te fare tapearaa e ua ite oia ua matara te mau uputa. Ua manaˈo oia e ua horo ê pauroa te feia tapeahia. Ua rave atura oia i ta ˈna ˈoˈe no te haapohe ia ˈna.

I taua iho â taime, ua tuô o Paulo: ‘Eiaha e haapohe ia oe! To ǒ nei matou pauroa!’ Horo atura te taata tiai i roto e topa turi ihora oia i mua ia Paulo raua Sila. Ua ani atura oia: “Ia aha vau e faaorahia ˈi au?” Ua pahono atura raua: ‘E mea tia ia tiaturi oe e to oe utuafare ia Iesu.’ I muri iho, ua haapii atu o Paulo raua Sila ia ratou no nia i te parau a Iehova e ua bapetizohia te taata tiai e to ˈna utuafare taatoa.