Филиппыга аза-букка алыскан чалча кыс чурттап чораан. Буктуң ачызында ол келир үеде чүү болурун баш удур чугаалап шыдаар турган. Улус аңаа акша төлеп бээрге, ол уругнуң ээлери хөй акша ажылдап ап турган. Павел биле Сила Филиппыга чедип кээрге, ол уруг оларның соондан эдерип: «Бо улус Дээди өрүкү Бурганның чалчалары-дыр» — деп алгырып турган. Ол чүүл каш хонук ишти уламчылап келген. Ынчан Павел: «Иисустуң ады-биле бо кыстан үне бер!» — деп дужаарга, бук үне берген.

Ол уругнуң ээлери ам акша ажылдап ап шыдавас апарганын билип кааш, аажок хорадаан. Олар Павел биле Силаны туткаш, хоорайның даргазынга чедире бергеш: «Бо улус хоорайда хөлзээзин үндүрүп, хоойлу үреп тур!» — дээн. Даргалар Павел биле Силаны эттеп-эттеп, кара-бажыңче киир октаптарын дужааган. Кара-бажың даргазы оларны иштики караңгы өрээлге олурткаш, буттарын доорбаш ыяшка чыпшыр демирлеп каан.

Павел биле Сила Иегованы ырыларга алдаржыдып эгелээрге, өске херектеннер дыңнап турган. Дүн ортузунда хенертен дыка күштүг чер шимчээшкини болган. Оон кара-бажыңның эжиктери ажыттынгаш, херектеннерниң доорбаш ыяштары база илчирбелери чештине берген. Кара-бажың даргазы халып келгеш көөрге, эжиктер ажык болган. Шупту херектеннер дезе берген деп бодааш, ол бодун өлүрер дээш хылыш уштуп эккелген.

Ынчан Павел: «Бодуңну өлүрбе, бис мында бис!» — деп алгырыпкан. Кара-бажың даргазы Павел биле Силаның мурнунга келгеш, дис кырынга олура дүшкеш: «Камгаланыр дизе, чүнү канчаар ужурлуг мен?» — деп айтырган. Олар аңаа: «Бодуң база өг-бүлең шупту Иисуска бүзүрээр ужурлуг силер» — дээн. Павел биле Сила оларга Иегованың дугайында чугаалап бээрге, шупту сугга суктуруп алганнар.