Ho vha hu na musidzana wa phuli ngei Filipi we a vha e na dimoni. Ḽeneḽo dimoni ḽo vha ḽi tshi shumisa onoyo musidzana sa mubvumbi nahone o vha a tshi itela vhatholi vhawe tshelede nnzhi. Musi Paulo na Silasi vha tshi swika Filipi, onoyo musidzana o vha tevhela maḓuvha manzhi. Dimoni ḽo ita uri a vhidzelele a ri: “Havha vhanna ndi vhashumeli vha Mudzimu Wa-Ṱaḓulu-ṱaḓulu.” Mafheleloni, Paulo o ri kha dimoni: ‘Nga dzina ḽa Yesu Kristo, ibvani khae!’ Ḽeneḽo dimoni ḽa bva kha onoyo musidzana.

Vhatholi vha onoyo musidzana vha sinyuwa vhukuma musi vha tshi ṱhogomela uri a nga si tsha vha itela tshelede. Vha kokodzela Paulo na Silasi ha vhavhusi, vha ri: ‘Havha vhanna vha khou pfuka mulayo na u vusa khakhathi khulu muḓini washu!’ Vhavhusi vha ri Paulo na Silasi vha rwiwe nahone vha iswe dzhele. Mulindadzhele a vha dzhenisa dzhele nga ngomungomu, hu re na swiswi vhukuma nahone a vha pata milenzhe nga thanda.

Paulo na Silasi vho imbela Yehova nyimbo dza thendo, ngeno vhaṅwe vhafariwa vho thetshelesa. Nga u ṱavhanya, vhukati ha vhusiku, ha mbo ḓi vha na mudzinginyo muhulu we wa dzinginyisa dzhele yoṱhe. Mavothi oṱhe a vulea, tshaini na thanda dza vhoṱhe vhe vha vha vho farwa dza vhofholowa. Mulindadzhele o mbo ḓi gidima a ya a wana mavothi oṱhe o vulea. A ṱomola banga a tshi ṱoḓa u ḓivhulaha, ngauri o vha a tshi humbula uri vho fariwaho vho shavha.

Fhedzi Paulo a vhidzelela a ri: ‘U songo ḓihuvhadza! Ri hone roṱhe!’ Nga u ṱavhanya mulindadzhele o dzhena nga ngomu a wela fhasi phanḓa ha Paulo na Silasi. A vha vhudzisa a ri: “Ndi fanela u ita mini uri ndi tshidzwe?” Vhone vha ri: ‘Inwi na vha muṱa waṋu ni fanela u tenda kha Yesu.’ Paulo na Silasi vha mu funza ipfi ḽa Yehova nahone mulindadzhele na vhoṱhe vha nnḓu yawe vha lovhedzwa.