Piliphisiyuusan, daydanttay oyqqido aylliyaa deˈawusu. He naˈiyaa daydanttaa wolqqan shareechiyo gishshawu, hegan ba godatussi daro miishshaa shiishshawusu. PHawuloosinne Sillaasi Piliphisiyuusa yiido wode, a daro gallassi eta kaallaasu. Daydanttay a, “Hageeti . . . Ubbaappe Bolla Xoossaa ailleta” gaada waassanaadan oottiis. Wurssettan, PHawuloosi daydanttaa, ‘Yesuusa sunttan ippe kiya!’ yaagidi azaziis. Daydanttay naˈeeppe kiyiis.

Naˈee godati hegaappe simmin eti i baggaara miishsha shiishshennaagaa akeekido wode, keehi hanqqettidosona. Eti PHawuloosanne Sillaasa daannatukko goochi efiidi hagaadan giidosona: ‘Hageeti higgiyaa kanttoosona; qassi kumetta katamaa shabbariiddi deˈoosona!’ PHawuloosanne Sillaasa wadhidi qasho keettan yegganaadan daannati azazidosona. Qasho keettaa naagiyaagee eta qasho keettaassi qolˈˈo gelissidi xuman mittaara gatti daraxidi qachiis.

Qashettida harati siyishin, PHauloosinne Sillaasi Yihoowa galatanawu mazamuriyaa yexxidosona. Akeekennan, qammi bilahe, biittay keehi qaaxxidi qasho keettaa huuphiyaappe xaphuwaa gakkanaassi qaattiis. Penggee ubbay wagaggi gi dooyettin, qashettida asaa sanssalatatinne eta qachido mittay birshetti wodhiis. Qasho keettaa naagiyaagee qasho keettaassi qolˈˈo eesoti gelidi penggee dooya deˈiyaagaa beˈiis. Qashettidaageeti ubbay kessi ekkidi biidosona giidi, i bana woranawu bisuwaa ekkiis.

He wode, PHawuloosi, ‘Nena qohoppa! Nuuni ubbay hagan deˈoos!’ yaagiis. Qasho keettaa naagiyaagee eesuwan qolˈˈo biidi PHawuloosanne Sillaasa sinttan gufanniis. I eta, “Taani attanau ai oottana bessii?” yaagiis. Eti ayyo, ‘Neeninne ne soo asay Yesuusa ammanana koshshees’ yaagidosona. Hegaappe guyyiyan, PHawuloosinne Sillaasi eta Yihoowa qaalaa tamaarissidosona; yaatin qasho keettaa naagiyaageenne a soo asay ubbay xammaqettiis.