Ha Filipos, may surugoon nga babaye nga ginsaniban hin demonyo. Ginhimo hiya hito nga parapanigo, salit daku an kita han iya mga agaron. Pagkadto nira Pablo ngan Silas ha Filipos, iya hira ginsinundan ha sulod hin damu ka adlaw. Ginpinaguliat hiya han demonyo: “Ini nga mga tawo uripon han Gihitaasi nga Dios.” Ha urhi, ginsidngan ni Pablo an demonyo: ‘Ha ngaran ni Jesus, gawas ha iya!’ An demonyo ginawas ha babaye.

Pakasabot han mga agaron han babaye nga diri na hira makakakwarta pinaagi ha iya, nasina gud hira. Ira gindanas hira Pablo ngan Silas ngadto ha mga mahistrado sibil, ngan nagsiring: ‘Ini nga mga tawo diri nasunod ha balaud ngan ginsasamok an bug-os nga syudad!’ An mga mahistrado nagsugo nga kastiguhon ngan prisuhon hira Pablo ngan Silas. Iginkadto hira han tinaporan ha prisohan ha gisusuluri ngan gisisirumi nga bahin han prisohan, ngan iginbutang ha pandugan an ira mga tiil.

Samtang nagkakanta hira Pablo ngan Silas hin mga pagdayaw kan Jehova, an iba nga priso namamati ha ira. Ha katutnga han gab-i, tigda la nga naglinog hin makusog ngan nabay-og an prisohan. Naabrihan an mga purtahan ngan natanggal an kadena ngan pandugan han mga priso. An tinaporan nagdagmit pagkadto ha gisusuluri nga bahin han prisohan ngan nakita niya nga abrido na an mga purtahan. Kahuna niya nakapuga an mga priso, salit ginhulbot niya an iya espada basi mag-unay.

Dida hito, ginuliat hi Pablo: ‘Ayaw pag-unay! Adi kami ngatanan!’ An tinaporan nagdagmit pagkadto kanda Pablo ngan Silas ngan linuhod. Nagpakiana hiya: “Ano an kinahanglan ko buhaton basi matalwas?” Hira binaton: ‘Kinahanglan tumoo ka kan Jesus pati an imo sulod-balay.’ Tapos, gintutdoan hira nira Pablo ngan Silas han pulong ni Jehova, ngan an tinaporan ha prisohan nabawtismohan pati an iya sulod-balay.