Tu kaajil Filiposeʼ yaan kaʼach juntúul x-chʼúupal ku naʼatik baʼax ku taal u kʼiin tumen okaʼan juntúul demonio tiʼ. Yoʼolal lelaʼ le x-chʼúupalaʼ ku náajaltik kaʼach yaʼab taakʼin utiaʼal u tsʼuuliloʼob. Ka kʼuch Pablo yéetel Silas teʼ kaajoʼ, le x-chʼúupalaʼ joʼopʼ u bin tu paachoʼob, xáanchaj bey u beetkoʼ. Le demoniooʼ ku beetik kaʼach u yawtik: ‹Le máakoʼobaʼ u palitsiloʼob le j-Sen Kaʼanal Diosoʼ›. Ka tsʼoʼokeʼ Pabloeʼ tu yaʼalaj tiʼ le demoniooʼ: ‹Tu kʼaabaʼ Jesucristoeʼ kin waʼaliktech ka jóokʼkech tiʼ le x-chʼúupalaʼ›. Le demonio túunoʼ jóokʼi.

Ka tu yilaj u tsʼuuliloʼob le x-chʼúupal maʼ tu páajtal u seguer u náajaloʼobeʼ jach pʼuʼujoʼob. Tu machoʼob Pablo yéetel Silaseʼ ka tu bisoʼob tu táan le máaxoʼob tsʼaʼan autoridad tiʼob teʼ kaajoʼ, ka tu yaʼaloʼob: ‹Le máakoʼobaʼ maʼ tu tsʼoʼokbeskoʼob le leyoʼ, táan u pʼuʼujsikoʼob tuláakal le kaajoʼ›. Le máaxoʼob tsʼaʼan autoridad tiʼoboʼ tu yaʼaloʼob ka jaʼajatsʼaʼakoʼob yéetel ka oksaʼakoʼob cárcel. Le máax kanáantik le carceloʼ tu kʼaloʼob tiʼ junpʼéel cuarto yaan tu tsʼuʼ le carceloʼ, teʼ tuʼux maas éeʼjochʼeʼenoʼ. Tsʼoʼoleʼ kʼaʼal u yookoʼob tiʼ junpʼéel nuʼukul ku kʼaabaʼtik cepo.

Pablo yéetel Silaseʼ joʼopʼ u kʼaayoʼob utiaʼal u alabartikoʼob Jéeoba, lelaʼ uʼuyaʼab tumen uláakʼ máakoʼob kʼalaʼanoʼoboʼ. Chéen baʼaleʼ chúumuk áakʼabeʼ tu sen tíituba le luʼumoʼ, ka péeknaj u chuunpakʼiloʼob le carceloʼ. U joonajiloʼobeʼ láaj jeʼepajoʼob, wáachʼ xan le cadenaʼob bey xan le tuʼux kʼalaʼan u yook le máakoʼoboʼ. Le máax kanáantik le carceloʼ áalkabil úuchik u bin tu maas taamil le carceloʼ, ka tu yilaj láaj jeʼekʼab u joonajiloʼob. Tu tuklaj láaj púutsʼ le máakoʼoboʼ, le oʼolal tu chʼaʼaj junpʼéel espada utiaʼal u kíimskuba.

Jach teʼ súutukoʼ, Pabloeʼ tu kʼaʼam aʼalaj: ‹¡Maʼ a loobiltkaba! ¡Tumen tuláakloʼon way yanoʼoneʼ!›. Le máax kanáantik le carceloʼ áalkabil úuchik u bin yiknal Pablo yéetel Silas, ka xolaj tu táanoʼob. Letiʼeʼ tu kʼáatajtiʼob: ‹¿Baʼax unaj in beetik utiaʼal ka in salvartinba?›. Letiʼobeʼ tu yaʼaloʼob: ‹Teech yéetel le máaxoʼob yanoʼob ta wotochoʼ unaj a creertikeʼex Jesús›. Pablo yéetel Silaseʼ joʼopʼ u kaʼanskoʼob tiʼob u tʼaan Jéeoba. Le máax kanáantik le cárcel bey xan le máaxoʼob yanoʼob tu yotochoʼ, okjaʼanajoʼob.