Kanga ni degude adu Firipoi yo naadu na daimona rogo ri yo. Daimona aamangasunge na gu degude re ri nigumba sangbaatoro, na ri anaakusa bakere marã fu airari. Ho aPauro na Sira aye ni ku Firipoi yo, ri apeka yo tipa dungu aˈuru. Daimona anaasa ri ri nita ngbari nga: “Agi aboro re i nga amoyambu fu gu Mbori du ni Bahe.” Niyangaraha, Pauro aya fu gu daimona re wẽ: ‘Ni rimo Yesu Kristo mo kuru rogo ri yo kusayo!’ Gu daimona re ki mbu gu degude re.

Ho airari aini gupai ni nga ri akusanga marã berewe fuyo te, i adu na bakere zinga. I agbefe aPauro na Sira koyo du agbiangbanga ni ki ya: ‘Agi akumba re nakuo ndiko na i ima ba gberãrago ti gi gbata re naabaha!’ Agbiangbanga azinahe nga i ta aPauro na Sira ki ba yo ku bambukiso yo. Babanda bambukiso aba yo kina boro ku rogo gu vurubambu naadu ti digido bambukiso yo ki vodi yo na azogbo.

Ti gu regbo aPauro na Sira aatambua Yekova rogo bia yo, kura ziziaboro aadegatuyo kaa giaha. Nibasa, bakere bazigizo amangi bebere yuru nga gu nazigizo bambukiso tona ariyo ki da kusende yo. Ngbadimo bambukiso azaki na agu ahe i avodi yo na ni ki zaki nisaha. Babanda bambukiso aoro ni ipo ku bambukiso yo, ko ki bi gupai nga angbadimo ni kina zakizakihe. Ko adi sape tipa ka imo tiko na ni mbiko ko aberẽ gupai nga ziziaboro ima kura dũ.

Nibasa, Pauro apoi kuari ki ya: ‘Ka mo imingo tiro ya! Ani dunduko kina ane!’ Gu babanda bambukiso re aoro ku dimoyo ki ti barangba aPauro na Sira. Ko ki sanayo nga: ‘Gine he si aida mi mangihe ka bata?’ I aya fuko: ‘Mo gbiati gamo aborokporo, si naida oni idipa Yesu.’ Sidu aPauro na Sira ayugu Fugo Yekova fuyo, gu babanda bambukiso re gbiati gako aborokporo ki zi bapatiza.