Timôtéô a bé mañge wanda i likoda li Listra. Isañ a bé man Grikia, nyañ a bak ngond Lôk Yuda. Nyañ Euniké, bo majô mé Lôis, bon ba bi niiga nye bañga i Yéhôva ibôdôl nye ntitigi.

Ngéda Paul a bi yuuga likoda li Listra mu likiiña jé li likalô li yônôs iba, a yimbe le Timôtéô a ngwés toi lôk tata, a gwéhék ki hôla bo. A bi naña Timôtéô le a kee ni nye mu likiña jé. Paul a bi yoñ ngandak ngéda inyu uñgus Timôtéô le tibil yi añal, ni niiga miñañ minlam.

Mbuu mpubi won u bé éga Paul bo Timôtéô to hee homa ba bé ke. U wada, ikété yiinda, ngim mut i kal Paul le a lôô i Makédônia inyu hôla bo. Jon Paul, Timôtéô, Silas, ni Lukas ba bi ke nyoo i téé likalô ni i uñgus makoda.

I tison Tésalônika, i nkoñ Makédônia, ngandak bôlôm ni bôda i bi yila bikristen. Ndi ngim bon i Lôk Yuda i bi bôdôl kil Paul ni mawanda mé njôñ. Ba boñ le limut li unbene bo, li ôt bo bisu bi baane ba tison, li londok le: ‘Bôt bana ba yé bakolba ba énél i Lôk Rôma!’ Jon Paul bo Timôtéô ba bi so juu ni juu i Béréa, inyule bôt ba bé yéñ nol bo.

Bôt ba Béréa ba bééna soso ngôñ i yi miñañ minlam, kayéle yak bon ba Grikia ni ba Lôk Yuda ba ba bé nyoo, ba bi yila bahémle. Kiki ngim Lôk Yuda i i bé lôl i Tésalônika, i bi lona yubda, Paul a ke i Atén. Ndi Timôtéô bo Silas ba bi yégle i Béréa inyu lédés lôk tata. I mbus ngim ngéda, Paul a timbis Timôtéô i Tésalônika inyu hôla lôk tata i kolba ndééñga keñi i bé nyoo.  Paul a bi om ki Timôtéô i yuuga ngandak makoda mape ni lédés mo.

Paul a añle Timôtéô le: ‘Nu ni nu a gwé ngôñ i gwélél Yéhôva a ga kôs ndééñga.’ Inyu hémle yé, Timôtéô a bi kôs ndééñga, a ke ki i mok. Ndi to hala, a bé kon maséé i éba le a tiñi ni Yéhôva.

Paul a añle Lôk Filipi le: ‘Me yé ômle bé Timôtéô. A ga niiga bé kii i kil maliga i nkobla, a ga uñgus ki bé inyu nson likalô.’ Paul a bé bôdôl Timôtéô ñem. Ba bé bañga mawanda ni baso bagwelnson, nwii ndi nwii.