Si Timoteus sahalak na poso di huria Listra. Bapakna halak Junani jala omakna halak Jahudi. Goar ni omakna si Eunike, goar ni ompung boruna si Lois. Sian dakdanak, nunga diajari omakna dohot ompungna ibana taringot Jahowa.

Tingki ro si Paulus tu kota Listra, diida ibana ma holong do roha ni si Timoteus tu angka dongan di huria. Alani i, ditogihon si Paulus ma si Timoteus asa rap dohot ibana. Diajari si Paulus ma si Timoteus asa malo marbarita na uli dohot mangajari.

Tudia pe si Paulus dohot si Timoteus laho, diurupi tondi parbadia do nasida. Di sada tingki, mandapot penglihatan ma si Paulus. Diida ibana ma sahalak baoa manogihon ibana tu kota Makedonia. Alani i, laho ma si Paulus, si Timoteus, si Silas, dohot si Lukas tusi. Marbarita ma nasida jala dibahen ma huria disi.

Di Makedonia, adong do kota na margoar Tessalonik. Godang do disi na gabe halak Kristen. Alai adong ma halak Jahudi na sogo rohana tu si Paulus dohot tu angka donganna. Dipapungu halak Jahudi i ma angka jolma laho mangusir nasida. Didok nasida ma, ‘Musu ni pamarenta ni Rom do angka baoa on!’ Boi do mate si Paulus dohot si Timoteus molo disi nasida. Alani i di tingki borngin, laho ma nasida tu Berea.

Lomo do roha ni halak Berea mambege barita na uli. Godang do halak Junani dohot halak Jahudi na disi gabe porsea tu Jahowa. Alai ro ma halak Jahudi sian Tessalonik manggugai nasida. Gabe laho ma si Paulus tu Atena. Tinggal do si Silas dohot si Timoteus di Berea laho mangurupi angka dongan asa unang mabiar nasida. Di pudian ni ari, disuru si Paulus ma muse si Timoteus tu Tessalonik laho patoguhon  angka dongan na disiksa. Dung i, disuru ma muse si Timoteus laho tu huria na asing laho patoguhon angka dongan.

Didok si Paulus ma tu si Timoteus, ‘Sai adong do tantangan tu angka halak na olo manomba Jahowa.’ Hea do si Timoteus disiksa jala dipenjarahon alani haporseaonna. Alai las do rohana ala mangoloi Jahowa.

Didok si Paulus ma tu huria na di Pilippi, ‘Husuru do si Timoteus ro mangajari hamu asa tongtong manomba Jahowa, jala mangajari hamu asa malo marbarita.’ Pos do roha ni si Paulus tu si Timoteus. Saleleng martaon-taon rap do nasida marbarita.