Timoti i wan yangfala brata long kongregesen blong Listra. Papa blong hem i wan man Gris, mo mama blong hem, Yunis, i wan woman Jiu. Stat taem Timoti i smol nomo, mama blong hem mo abu woman blong hem Loes, tufala i tijim hem long saed blong Jehova.

Long namba tu trip blong Pol, hem i go long Listra, mo i luk we Timoti i lavem ol brata mo i wantem tumas blong givhan long olgeta. Ale, Pol i askem long Timoti blong i folem hem. Sloslo, Pol i trenem hem blong i kam wan gudfala man blong talemaot gud nius mo blong tijim ol man.

Tabu spirit i stap wetem Pol mo Timoti long evri ples we tufala i go long hem. Wan naet, Pol i luk wan vison, we wan man i talem long hem blong i kam long Masedonia. Ale, Pol, Timoti, Saelas, mo Luk, oli go prij longwe, mo oli stanemap ol kongregesen.

Long wan taon long Masedonia we nem blong hem Tesalonaeka, plante man mo woman oli kam Kristin. Be sam man Jiu oli jalus long Pol mo ol fren blong hem. Wan bigfala grup blong olgeta i holemtaet ol brata, mo i tekem olgeta oli go long ol lida blong taon ya. Oli stap singaot bigwan se: ‘!Ol man ya oli agensem gavman blong Rom!’ Laef blong Pol mo Timoti i stap long denja, ale long naet, tufala i ronwe i go long Berea.

Ol man Berea oli wantem tumas blong harem gud nius. Plante man Gris mo plante man Jiu tu oli bilif. Be sam man Jiu oli aot long Tesalonaeka oli kam mekem trabol long Berea, ale Pol i girap i go long Atens. Timoti mo Saelas i stap long Berea blong mekem bilif blong ol brata i strong. Biaen, Pol i sanem Timoti i gobak long Tesalonaeka blong givhan long ol brata, from we ol man oli stap ronem mo kilim olgeta.  Afta, Pol i sanem Timoti i go visitim plante narafala kongregesen, blong leftemap tingting blong olgeta.

Pol i talem long Timoti se: ‘Olgeta we oli wantem mekem wok blong Jehova bae oli kasem trabol. Ol man bae oli agensem olgeta.’ Oli agensem Timoti, mo oli sakem hem long kalabus from bilif blong hem. Be hem i glad nomo, from we hem i luk samting ya olsem wan janis blong soemaot long Jehova se hem i lavem hem.

Pol i talem long ol brata long Filipae se: ‘Bae mi sanem Timoti i kam long yufala. Bae hem i tijim yufala blong laef olsem ol man blong Jehova, mo bae i trenem yufala blong prij.’ Pol i trastem Timoti. Tufala i wok tugeta mo fren gud blong plante yia.